ପୁରୀ: ଲଗାଣ ବର୍ଷା ରାଜ୍ୟରେ ବିଷମ ସ୍ଥିତି ସୃଷ୍ଟି କରିଛି । ଅନେକ ଗାଁ ଗଣ୍ଡା ଜଳମଗ୍ନ ରହିଛି । ପୁରୀ ଜିଲ୍ଲା ପିପିଲି ଅନ୍ତର୍ଗତ ପୋପରଙ୍ଗା ପଞ୍ଚାୟତର ପାଚଲପୁର ଗ୍ରାମବାସୀ ଜଳବନ୍ଦୀ ଅବସ୍ଥାରେ ରହିଛନ୍ତି । ଗଙ୍ଗୁଆ ନାଳ ପାଣି ଉଛୁଳି ଗାଁରେ ପଶିବାରୁ ଏଭଳି ସ୍ଥିତି ସୃଷ୍ଟି ହୋଇଛି । ରାସ୍ତା ଉପରେ ଆଣ୍ଠୁଏ ଉଚ୍ଚର ପାଣି ଚାଲୁଛି । ଶହ ଶହ ଚାଷ ଜମିରେ ପାଣିରେ ବୁଡି ରହିଥିବା ବେଳେ ନଦୀର ଭ୍ରମ ସୃଷ୍ଟି କରୁଛି । ତେବେ ଗତବର୍ଷ ବନ୍ୟା ଯୋଗୁଁ ଗଙ୍ଗୁଆ ନାଳରେ ସୃଷ୍ଟି ହୋଇଥିବା ଘାଇ ମରାମତି ନ ହେବା ଜଳବନ୍ଦୀର ମୁଖ୍ୟ କାରଣ ବୋଲି ବନ୍ୟା ବିପନ୍ନ ଅଭିଯୋଗ କରିଛନ୍ତି । ବିଭାଗୀୟ ଅଧିକାରୀଙ୍କ ଅବହେଳା ଯୋଗୁଁ ଲୋକଙ୍କୁ ଏଭଳି ଦୁର୍ଦ୍ଦଶା ଭୋଗିବାକୁ ପଡୁଥିବା ଅଭିଯୋଗ ହୋଇଛି ।
ପାଚଲପୁର ଗ୍ରାମର ୩୨ ପରିବାର ଜଳବନ୍ଦୀ ଜୀବନ ବିତାଉଛନ୍ତି । ଗଙ୍ଗୁଆରେ ପ୍ରବାହିତ ବର୍ଷା ଜଳ ତାଣ୍ଡବ ରଚିଛି ଏହି ଅଞ୍ଚଳରେ । ରାତିକ ମଧ୍ୟରେ ସମ୍ପୂର୍ଣ୍ଣ ଗାଁ ଜଳମଗ୍ନ ହୋଇଯାଇଥିବା ହେକ୍ଟର ହେକ୍ଟର ଚାଷ ଜମି ଉଜୁଡ଼ି ଯାଇଛି । ପନିପରିବା ଓ ଧାନ ଫସଲ ସବୁକିଛି ପାଣିରେ ବିଲୀନ ହୋଇଯାଇଛି । ଏହା ପଛର କାରଣ ରହିଛି ବିଭାଗୀୟ ଅଧିକାରୀଙ୍କ ଅବହେଳା ଓ ଦାୟିତ୍ବହୀନତା । ଗତ ବର୍ଷକ ତଳେ ଗଙ୍ଗୁଆରେ ସୃଷ୍ଟି ହୋଇଥିବା ଘାଇ କାରଣରୁ ୨୫ ଦିନ ଧରି ଯମ ଯନ୍ତ୍ରଣା ଭୋଗିଥିଲେ ପାଚଲପୁର ଗ୍ରାମବାସୀ । ପୁଣି ମାତ୍ର ବର୍ଷକ ପରେ ମଧ୍ୟ ସମଦଶା ଭୋଗୁଛନ୍ତି ଏହି ଗାଁ ଲୋକେ ।