ପୁରୀ: ବହୁଚର୍ଚ୍ଚିତ ପୁରୀ ଗଣଦୁଷ୍କର୍ମ ମାମଲାରେ ଆଉ ଜଣେ ଅଭିଯୁକ୍ତ ଗିରଫ । ପୁରୀ ଗଣଦୁଷ୍କର୍ମ ମାମଲାରେ ଜଡିତ ଥିବା ଆଉ ଏକ ଦୁଷ୍କର୍ମକାରୀକୁ ରବିବାର ରାୟଗଡ଼ାରୁ ଗିରଫ କରିଛି ପୋଲିସ ।
ସୂଚନା ଅନୁଯାୟୀ, ସୋମବାର ସକାଳେ ଏକ ବିଶେଷ ସୂତ୍ରରୁ ଖବର ପାଇ ପୁରୀର ଏକ ପୋଲିସ ଟିମ ରାୟଗଡାରେ ପହଞ୍ଚି ଥିଲେ । ଏହାପରେ ପୁରୀ ପୋଲିସ ରାୟଗଡା ପୋଲିସ ସହାୟତାରେ ନାଗାବଳୀ ନଦୀ ଚେକାଗୁଡା ଘାଟରୁ ଅଭିଯୁକ୍ତ ଗାଧୋଇବାକୁ ଯାଇଥିବାବେଳେ ଅତର୍କିତ ଚଢ଼ାଉ କରି ଗାଧୁଆ ତୁଠରୁ ଅଭିଯୁକ୍ତକୁ ଗିରଫ କରିଥିବା ଜଣାପଡିଛି।
ଗିରଫ ଅଭିଯୁକ୍ତ ଜଣକ ପୁରୀ ଜିଲ୍ଲା ରେଣ୍ଢା ଗ୍ରାମର ବୁଲୁ ବାରିକ ଏବଂ ସେ ପଞ୍ଜାବ ରାଜ୍ୟରେ ସିଆରପିଏଫରେ କାର୍ଯ୍ୟରତ ରହିଥିବା ସୂଚନା ମିଳିଛି । ତେବେ ସେ ରାୟଗଡା ରାଣୀଗୁଡା ଅଞ୍ଚଳର ସମ୍ପର୍କୀୟଙ୍କ ଘରକୁ ନିଜକୁ ପୋଲିସ କବଳରୁ ବଞ୍ଚାଇବାକୁ ଆସିଥିବା ଜଣାପଡ଼ିଛି।
ତେବେ ବର୍ତ୍ତମାନ ସୁଦ୍ଧା ସଠିକ ଭାବେ ସମ୍ପୂର୍ଣ ଠିକଣା ହସ୍ତଗତ ହୋଇନାହିଁ। ଅନ୍ୟପଟେ ଅଭିଯୁକ୍ତକୁ ଗିରଫ ପରେ ପୁରୀ ପୋଲିସ ଟିମ ପୁରୀ ଅଭିମୁଖେ ବାହାରିଥିବା ଜଣାପଡିଛି। ସେପଟେ ଏହା ଏକ ସମ୍ବେଦନଶୀଳ ମାମଲା ହୋଇଥିବାରୁ ଏନେଇ କୌଣସି ପ୍ରକାର ପ୍ରତିକ୍ରିୟା ଦେବାକୁ ମନା କରି ଦେଇଛି ରାୟଗଡା ପୋଲିସ ପ୍ରଶାସନ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
