ବଡ ଠାକୁର ଦେଖିବାକୁ ବୟସ ତ କେବଳ ସଂଖ୍ୟା ମାତ୍ର...

ପବିତ୍ର ଅଧରପଣା ନୀତି ପାଇଁ ବଡଦାଣ୍ଡକୁ ଛୁଟୁଛି ଶ୍ରଦ୍ଧାଳୁଙ୍କ ସୁଅ । ରଥାରୂଢ କାଳିଆ ସାଆନ୍ତକୁ ଦେଖିବା ପାଇଁ କେବଳ ଯୁବଗୋଷ୍ଠି ଆସୁଛନ୍ତି ତାହା ନୁହେଁ ବୟସ୍କ ଲୋକଙ୍କ ମଧ୍ୟ ଭିଡ ଦେଖିବାକୁ ମିଳିଛି । ପ୍ରବଳ ଭିଡ ଯୋଗଁକୁ ଅନେକ ବୟସ୍କ ବ୍ୟକ୍ତି ହଜିଯାଉଥିବାରୁ ତାହା ପ୍ରଶାସନ ପାଇଁ ଚିନ୍ତାର କାରଣ ପାଲିଟିଛି ।

ପୁରୀ: ହାତରେ ଆଶା ବାଡି । ମନରେ କାଳିଆ ଡୋରି। ବୟସ ସାଥ ନଦେଲେ ବି ଟାଣିଆଣିଛି ବଡ ଠାକୁର। କାହିଁ କେତେ ଦୁରରୁ ପୁରୀକୁ ପାଦ ପଡିଛି । କେବଳ ସେଇ ହଟିଆ ଠାକୁର ନଟିଆ ବେଶ ଦେଖିବାକୁ । ପୁରୀ ବଡ ଦାଣ୍ଡରେ ଦେଖିବାକୁ ମିଳିଛି ବୟସ୍କ ଶ୍ରଦ୍ଧାଳୁଙ୍କ ଭିଡ ।

ଯେଉଁମାନେ ଧାଇଁ ଆସିଛନ୍ତି ରଥାରୂଢ କାଳିଆ ଠାକୁରଙ୍କୁ ଟିକେ ମନଭରି ଦେଖିବା ପାଇଁ । କିଏ ଏକୁଟିଆ, ତ ପୁଣି କିଏ ପରିବାର ସହ । ସବୁ ସେଇ କାଳିଆର ଡୋରି ଲାଗିଛି ଭାବି ଧାଇଁ ଆସିଛନ୍ତି ଶ୍ରୀକ୍ଷେତ୍ର ପୁରୀକୁ। ସେପଟେ ବଡଦାଣ୍ଡ ଜନ ସମୁଦ୍ର ପାଲିଟିଥିବାରୁ ଭିଡ ମଧ୍ୟରେ ଅନେକ ବୃଦ୍ଧ ଓ ବୃଦ୍ଧା ହଜିଯାଉଥିବା ମଧ୍ୟ ଦେଖିବାକୁ ମିଳିଛି । ଅନେକଙ୍କୁ ସୂଚନା କେନ୍ଦ୍ର ସହାୟତାରେ ମିଳୁଥିବା ବେଳେ ଅନେକ ଏବେବି ନିଖୋଜ ଅଛନ୍ତି । ଯାହା ପ୍ରଶାସନ ପାଇଁ ଚିନ୍ତାର କାରଣ ପାଲଟିଛି ।

ପୁରୀରୁ ତାପସ ପରିଡା, ଇଟିଭି ଭାରତ