ପୁରୀ: ପୁରୀ ଜିଲ୍ଲାର ଐତିହ୍ୟ ଗ୍ରାମ ରଘୁରାଜପୁରକୁ ଆଉ ଏକ ସଫଳତା । କେନ୍ଦ୍ର ପର୍ଯ୍ୟଟନ ବିଭାଗ ପକ୍ଷରୁ ଶ୍ରେଷ୍ଠ ପର୍ଯ୍ୟଟନ ଗ୍ରାମ ପ୍ରତିଯୋଗିତାରେ ସମସ୍ତ ଯୋଗ୍ୟତା ପୂରଣ କରି 2023 ବର୍ଷ ପାଇଁ ଶ୍ରେଷ୍ଠ ପର୍ଯ୍ୟଟନ ଗ୍ରାମର ମାନ୍ୟତା ସହ ସମ୍ମାନିତ ହୋଇଛି । ଏହି ଗୌରବ ଓ ସଫଳତା ପାଇଁ ରଘୁରାଜପୁରରେ ଆନନ୍ଦର ଲହରୀ ଖେଳିଯାଇଛି । ବିଶ୍ଵ ପର୍ଯ୍ୟଟନ ଦିବସ ଅବସରରେ କେନ୍ଦ୍ର ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ନୂଆଦିଲ୍ଲୀର ଭାରତ ମଣ୍ଡପମ ଠାରେ ଆୟୋଜିତ ସ୍ଵତନ୍ତ୍ର ଉତ୍ସବରେ ରଘୁରାଜପୁର ଗାଁକୁ ଏହି ସମ୍ମାନରେ ସମ୍ମାନିତ କରାଯାଥିଲା । ଓଡ଼ିଶା ପର୍ଯ୍ୟଟନ ବିଭାଗର ଯୁଗ୍ମ ନିର୍ଦ୍ଦେଶକ ବିଶ୍ବଜିତ୍ ରାଉତରାୟ ଓ ରଘୁରାଜପୁର ଗ୍ରାମର ସଭାପତି ଲକ୍ଷ୍ମୀଧର ସୁବୁଦ୍ଧି ଉପସ୍ଥିତ ରହି ଏହି ସମ୍ମାନ ଗ୍ରହଣ କରିଥିଲେ ।
ଶିଳ୍ପୀ ସୁଦର୍ଶନ ସ୍ବାଇଁ କହିଛନ୍ତି, ‘‘ଆମ ଗାଁକୁ ଏହି ସମ୍ମାନ ମିଳିଥିବାରୁ ଗ୍ରାମରେ ଆନନ୍ଦର ଲହରୀ ଖେଳିଯାଇଛି । କଳା, ସଂସ୍କୃତି ଓ ଐତିହ୍ୟରେ ପରିପୂର୍ଣ୍ଣ ପୁରୀ ଜିଲ୍ଲାର ରଘୁରାଜପୁର ଗ୍ରାମ ସଦା ସର୍ବଦା ଆକର୍ଷଣର କେନ୍ଦ୍ରବିନ୍ଦୁ ସାଜିଛି । 2000 ମସିହାରେ ଓଡ଼ିଶାର ପ୍ରଥମ ଐତିହ୍ୟ ଗ୍ରାମ ଭାବେ ରଘୁରାଜପୁର ମାନ୍ୟତା ପାଇଥିଲା । ଗ୍ରାମ ବାସିନ୍ଦାମାନେ ଓଡ଼ିଆ କଳା, ସଂସ୍କୃତିକୁ ପଟ୍ଟଚିତ୍ରରେ ସ୍ଥାନ ଦେଇ ପ୍ରଚାର ପ୍ରସାର କରିଆସୁଛନ୍ତି । ତେବେ ଏହି ଐତିହ ଗ୍ରାମ ପ୍ରଚାର ପ୍ରସାର ପାଇଁ ଓଡ଼ିଶା ପର୍ଯ୍ୟଟନ ବିଭାଗ ଆହୁରି ଭିତ୍ତିଭୂମି ସୁଦୃଢ଼ କରିବାର ଆବଶ୍ୟକତା ରହିଛି।’’
ସମ୍ପାଦକ ଅଭିରାମ ଦାଶ କହିଛନ୍ତି, ‘‘ଦେଶର 31ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରୁ ଭିନ୍ନଭିନ୍ନ ଗାଁ ପାଇଁ 795ଟି ଆବେଦନ ଆସିଥିଲା । ଓଡ଼ିଆର 13ଟି ଜିଲ୍ଲାରୁ 40ଟି ଆବେଦନ ଯାଇଥିଲା । ସମସ୍ତଙ୍କୁ ପଛରେ ପକାଇ ଓଡ଼ିଶାର ରଘୁରାଜପୁର ପ୍ରତିଯୋଗିତାର ରୌପ୍ୟ ବର୍ଗରେ ଶ୍ରେଷ୍ଠ ପର୍ଯ୍ୟଟନ ଗ୍ରାମ ଭାବେ ସମ୍ମାନିତ ହୋଇଛି । ଏହି ଗାଁରେ ବିଶିଷ୍ଟ ଓଡ଼ିଶୀ ନୃତ୍ୟ ଶିଳ୍ପୀ ପଦ୍ମ ବିଭୂଷଣ ଗୁରୁ କେଳୁ ଚରଣ ମହପାତ୍ରଙ୍କ ଠାରୁ ଆରମ୍ଭ କରି ପ୍ରବାଦପୁରୁଷ ପଟ୍ଟକଳାର ଗୁରୁ ଡଃ ଜଗନ୍ନାଥ ଦାସ ଜନ୍ମଗ୍ରହଣ କରି ଓଡିଶାକୁ ବିଶ୍ବଦରବାରରେ ଏକ ନିଆରା ପରିଚୟ ପ୍ରଦାନ କରିଛନ୍ତି ।’’