‘ନେତପିଲା ପୂଜା’: କୁନିବୋହୂ ସାଜିଛନ୍ତି କୁନିକଣ୍ଢେଇ

ସୁନ୍ଦର ବର ଓ ସୁଖୀ ସଂସାର ପାଇଁ ପୁରୀର ଅନନ୍ୟ ପରମ୍ପରା ‘ନେତପିଲା ପୂଜା’ । ସ୍ବର୍ଣ୍ଣଅଳଙ୍କାର ଓ ବିଭିନ୍ନ ବେଶ ପରିପାଟିରେ ସଜେଇ ହୋଇଥାନ୍ତି କୁନି କୁନି ଝିଅ ।

ପୁରୀ: ମହାପ୍ରଭୁ ଶ୍ରୀଜଗନ୍ନାଥଙ୍କୁ ନେଇ ଶ୍ରୀକ୍ଷେତ୍ରର ସଂସ୍କୃତି ଓ ପରମ୍ପରା । ଶ୍ରୀକ୍ଷେତ୍ରର ଏକ ଅନନ୍ୟ ପରମ୍ପରା ହେଉଛି ସେବାୟତ କୂଳର ନେତପିଲା ପୂଜା । ପୁରୀର ସେବାୟତ କୂଳର 3 ବର୍ଷରୁ 9 ବର୍ଷ ନାବାଳିକା କରିଥାନ୍ତି ଏହି ପୂଜା ।

ଭବିଷ୍ୟତରେ ସୁନ୍ଦର ବର ଓ ସୁଖୀ ସଂସାର ପାଇଁ ନେତ ପିଲାମାନେ ହର ପାର୍ବତୀଙ୍କୁ ପୂଜା କରିଥାନ୍ତି । ଇନ୍ଦୁ ପୂର୍ଣ୍ଣିମା ଠାରୁ ୨୧ଦିନ ଧରି ଏହି ପୂଜା କରାଯାଇଥାଏ । ପ୍ରଥମ ୧୫ ଦିନ ଘରେ ପୂଜା କରିଥାନ୍ତି । ଏହାପରେ ଆଶ୍ବୀନ ପଞ୍ଚମୀ ଠାରୁ ଅଷ୍ଟମୀ ପର୍ଯ୍ୟନ୍ତ ନେତ ପିଲାମାନେ ନିଜର ଆଈ ତଥା ମାଆଙ୍କ ସହିତ ଆସି ମାର୍କଣ୍ଡ ପୁଷ୍କରିଣୀ କୂଳରେ ମା’ ଗୌରୀଙ୍କୁ ପୂଜା କରିଥାନ୍ତି।

ବିଭିନ୍ନ ସ୍ବର୍ଣ୍ଣ ଅଳଙ୍କାର ଓ ବେଶ ପରିପାଟିରେ ସଜ୍ଜିତ ହୋଇଥାନ୍ତି ପିଲାମାନେ । ସାଥିରେ ପାଣିକଖାରୁ, ଖଣ୍ଡ ହଳଦି, ଜହ୍ନିଳ,ମକା, କାକୁଡି, ନଡିଆ ଆଦି ନେଇ ମାର୍କଣ୍ଡ କୂଳରେ ପହଞ୍ଚନ୍ତି ପିଲା । ଠାକୁରଙ୍କୁ ବନ୍ଦାପନା କରି ବଳି ଓ କାଟି ଗୀତ ଗାଇଥାନ୍ତି ନେତପିଲା । ଅଷ୍ଟମୀ ତିଥିରେ ପୂଜା ଶେଷ ପରେ ସମସ୍ତ ପୂଜା ସାମଗ୍ରୀକୁ ମାର୍କଣ୍ଡ କୂଳରେ ବିସର୍ଜନ କରାଯାଇଥାଏ । ଏହାପରେ ପିଲାମାନେ ପ୍ରଭୁ ମାର୍କଣ୍ଡେୟଙ୍କୁ ଦର୍ଶନ କରି ବ୍ରତ ଶେଷ କରିଥାନ୍ତି ।

ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ