ଚୋରଙ୍କ ନଜରରୁ ବର୍ତ୍ତିଲାନି ଶ୍ରୀମନ୍ଦିର: ଦକ୍ଷିଣ ଦ୍ବାର ଗୁମୁଟ ଦାନବାକ୍ସରୁ ଚୋରି, ସୁରକ୍ଷାକୁ ନେଇ ଉଠିଲା ପ୍ରଶ୍ନ

ଶ୍ରୀମନ୍ଦିର ଦାନବାକ୍ସ ଲୁଟ । ଶ୍ରୀମନ୍ଦିର ଦକ୍ଷିଣ ଦ୍ୱାର ଗୁମୁଟ ଦାନବାକ୍ସରୁ ଚୋରି ହୋଇଛି । ଘଟଣାକୁ ନେଇ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠିଛି । ଅଧିକ ପଢନ୍ତୁ

ପୁରୀ:ଶ୍ରୀମନ୍ଦିର ଗୁମୁଟ ଦାନବାକ୍ସରୁ ଚୋରି ହୋଇଛି । ଶ୍ରୀମନ୍ଦିର ଦକ୍ଷିଣ ଦ୍ବାର ଗୁମୁଟ ଦାନବାକ୍ସରୁ ଚୋରି ହୋଇଥିବା ଜଣାପଡିଛି । ଦାନବାକ୍ସକୁ ନୃସିଂହ ମନ୍ଦିର ପଛପଟୁ ଜେଟିପି ଉଦ୍ଧାର କରି ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର କରିଛି । ଦୁର୍ବୃତ୍ତ ଦାନବାକ୍ସରୁ ଚୋରି କରିବା ପରେ ଏହାକୁ ସେଠାରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି । ଏହି ଘଟଣାକୁ ନେଇ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି ।

ଭୀମଙ୍କ ପ୍ରତିମୂର୍ତ୍ତି ତଳେ ଥିବା ଦାନବାକ୍ସକୁ ଲୁହା ରଡରେ ତଡାଯାଇ ଲୁଟ କରାଯାଇଛି । ଆଜି (ଶୁକ୍ରବାର) ସକାଳେ ଏହା ଜଣାପଡିଛି । ଶ୍ରୀମନ୍ଦିର ଭିତରେ ଓ ଚାରି ଦ୍ୱାରରେ ପୋଲିସ୍ ପ୍ରହରା ରହିଥାଏ । 24 ଘଣ୍ଟା ପୋଲିସ ପ୍ରହରା ଦେଉଥାଏ । ହେଲେ କିପରି ଦାନବାକ୍ସ ଲୁଟ ହେଲା ସେ ନେଇ ଭକ୍ତ ମହଲରେ ପ୍ରଶ୍ନ ଉଠୁଛି । ଶ୍ରୀମନ୍ଦିର ଭିତରେ ମହାପ୍ରଭୁଙ୍କ ପହୁଡ଼ ନୀତି ପରେ ସମସ୍ତ ଦ୍ୱାର ବନ୍ଦ କରାଯିବା ପରେ ଉଭୟ ଜେଟିପି ଓ ଓଡ଼ିଶା ପୋଲିସ ସୁରକ୍ଷା ଦାୟିତ୍ଵରେ ରୁହନ୍ତି । ହେଲେ ଏତେ ସୁରକ୍ଷା ବ୍ୟବସ୍ଥାରେ କିଭଳି ଲୁଟ ହେଲା ଦାନବାକ୍ସ, କେମିତି ପୋଲିସ୍ ଜାଣିପାରିଲା ନାହିଁ ସେ ନେଇ ପ୍ରଶ୍ନ ଉଠିଛି । ଶ୍ରୀମନ୍ଦିରର ଢିଲା ସୁରକ୍ଷା ବ୍ୟବସ୍ଥା ଥିବା ଇଙ୍ଗିତ କରୁଛି ଏହି ଘଟଣା ।

ପୂର୍ବରୁ ଶ୍ରୀମନ୍ଦିର ରୋଷ ଘରେ ଜଣେ ବ୍ୟକ୍ତି ରାତିରେ ଲୁଚି ରହି ଚୁଲା ଭାଙ୍ଗି ଦେଇଥିବା ଘଟଣା ସାମ୍ନାକୁ ଆସିଥିଲା । ପରେ ଶ୍ରୀମନ୍ଦିର ସୁରକ୍ଷା ନେଇ ବହୁ ତୁମ୍ବି ତଫାନ ପରେ ଶ୍ରୀମନ୍ଦିର ଭିତରେ ଉଭୟ ଓଡ଼ିଶା ପୋଲିସ ଓ ଜଗନ୍ନାଥ୍ ମନ୍ଦିର ପୋଲିସ୍ ଉଭୟ ମିଳିତ ଭାବେ ସୁରକ୍ଷା ଦାୟିତ୍ବ ନେଇଥିଲେ । ରାତ୍ର ପହୁଡ଼ ପରେ ଶ୍ରୀମନ୍ଦିର ଭିତରେ କେହି ବ୍ୟକ୍ତି ରହି ନଥାନ୍ତି । ତଥାପି ଦାନବାକ୍ସରୁ ଚୋରି ହେବା ଚର୍ଚ୍ଚାର ବିଷୟ ହୋଇଛି ।

ସେହିଭଳି ଏହି ଗୋଟିଏ ଘଟଣା ନୁହେଁ ପୂର୍ବରୁ ଶ୍ରୀମନ୍ଦିର ଭିତରୁ ଅନେକ ବ୍ୟକ୍ତି ଭିଡ଼ିଓ ଉତ୍ତୋଳନ କରି ସୋସିଆଲ ମିଡ଼ିଆରେ ପୋଷ୍ଟ କରିଥିବା ଘଟଣା ମଧ୍ୟ ସାମ୍ନାକୁ ଆସିଛି ହେଲେ ସଜାଗ ହୋଇନାହିଁ ପ୍ରଶାସନ । ପୁଣି ଦାନବାକ୍ସରୁ ଚୋରି ହେବା ଘଟଣାକୁ ନେଇ ଭକ୍ତ ମହଲରେ ଅସନ୍ତୋଷ ପ୍ରକାଶ ପାଇଛି । ତୁରନ୍ତ ପୋଲିସ ଡିଜି ଏହାକୁ ଗୁରୁତର ଭାବେ ଗ୍ରହଣ କରି ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବାକୁ ଭକ୍ତ ମହଲରେ ଦାବି ହୋଇଛି ।

ଇଟିଭି ଭାରତ, ପୁରୀ