ଚିଲିକାରେ ବ୍ରିଜ ନିର୍ମାଣ ନେଇ କେନ୍ଦ୍ର ମନ୍ତ୍ରୀ ବିଶେଶ୍ୱର ଟୁଡୁଙ୍କୁ ଦାବିପତ୍ର ପ୍ରଦାନ ପୁରୀ: ସାତପଡ଼ା ଠାରୁ ଜହ୍ନିକୁଦା ଯାଏ ଚିଲିକାରେ ଏକ ବ୍ରିଜ ନିର୍ମାଣ ପାଇଁ ଦୀର୍ଘ ଦିନ ହେବ ଦାବି ହୋଇଆସୁଛି । ହେଲେ ବାରମ୍ବାର ଦାବି ସତ୍ତ୍ବେ ବିଭିନ୍ନ ସମସ୍ୟାକୁ ନେଇ ଏହି ଦାବି ପୂରଣ ଦିଗରେ ସମସ୍ୟା ସୃଷ୍ଟି ହୋଇଛି । ଫଳରେ ଲୋକଙ୍କ ଯାତାୟତରେ ଏବେ ବି ସମସ୍ୟା ଲାଗି ରହିଛି । ଏହାରି ଭିତରେ ପୁରୀ ଗସ୍ତରେ ଆସିଥିବା କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ ବିଶେଶ୍ବର ଟୁଡୁଙ୍କୁ ଏହି ବ୍ରିଜ ନିର୍ମାଣ ପାଇଁ ଏକ ଦାବିପତ୍ର ପ୍ରଦାନ କରାଯାଇଛି । ସାତପଡ଼ା ଜହ୍ନିକୁଦା ବ୍ରିଜ ନିର୍ମାଣ କମିଟିର ସଭାପତିଙ୍କ ନେତୃତ୍ବରେ ଦାବିପତ୍ର ଦିଆଯାଇଛି ।
ଏହାମଧ୍ୟ ପଢନ୍ତୁ: ଶୁଣିଲାନି ପ୍ରଶାସନ, ନିଜ ଅର୍ଥରେ ଗାଁକୁ ରାସ୍ତା ତିଆରି କଲେ ଗ୍ରାମବାସୀ
ଏଠାରେ ବ୍ରିଜ ନିର୍ମାଣ ଦ୍ବାରା ହଜାର ହଜାର ଲୋକ ଉପକୃତ ହୋଇପାରିବେ । ପୂର୍ବରୁ ଏହି ବ୍ରିଜ ନିର୍ମାଣ ନେଇ ଉଦ୍ୟମ ହୋଇଥିଲେ ମଧ୍ୟ ପରିବେଶ ଓ ଜୈବ ବିବିଧତା ନଷ୍ଟ ହେବା ତଥ୍ୟ ନେଇ ନିର୍ମାଣ କାର୍ଯ୍ୟ ଆଗେଇ ପାରୁନାହିଁ । ସାତପଡ଼ା ଜହ୍ନିକୁଦା ବ୍ରିଜ ନିର୍ମାଣ କମିଟି ସଭାପତି ଅଭିମନ୍ୟୁ ଜେନା କହିଛନ୍ତି, ''ଚିଲିକାରେ ହଜାର ହଜାର ଯନ୍ତ୍ରଚାଳିତ ଡଙ୍ଗା ଯାତାୟତ ଲାଗି ଡିଜେଲ ବ୍ୟବହାର ଯୋଗୁଁ ପରିବେଶ ପ୍ରଦୂଷଣ ହେଉଛି । ଯନ୍ତ୍ରଚାଳିତ ଡଙ୍ଗା ମାଡରେ ବିରଳ ସାମୁଦ୍ରିକ ଜୀବ, ଡଲଫିନଙ୍କ ଅକାଳରେ ମୃତ୍ୟୁ ହେଉଛି । ଏଣୁ ସାତପଡ଼ାରୁ ଜହ୍ନିକୁଦାକୁ ସ୍ଥାୟୀ ବ୍ରିଜ ନିର୍ମାଣ ହେଲେ ଆଉ ପରିବେଶ ପ୍ରଦୂଷଣ ହେବ ନାହିଁ କି ବିରଳ ସାମୁଦ୍ରିକ ଜୀବ ମୃତ୍ୟୁମୁଖରେ ପଡ଼ିବେ ନାହିଁ । ଏଣୁ ବ୍ରିଜ ଯୋଗୁଁ ଚିଲିକାରେ ପରିବେଶ, ଜୈବ ବିବିଧତା ନଷ୍ଟ ହେବା ପ୍ରସଙ୍ଗ ସମ୍ପୂର୍ଣ୍ଣ ଭିତ୍ତିହୀନ ।’’
ସେପଟେ କେନ୍ଦ୍ରମନ୍ତ୍ରୀ ବିଶେଶ୍ୱର ଟୁଡୁ କହିଛନ୍ତି ଯେ, ଉଭୟ କେନ୍ଦ୍ର ଓ ରାଜ୍ୟ ସରକାର ମିଶି ଏହି କାର୍ଯ୍ୟ କଲେ ବ୍ରିଜ ନିର୍ମାଣ ଶୀଘ୍ର ସମ୍ଭବ ହୋଇପାରିବ । ଚିଲିକାରେ ବ୍ରିଜ ନିର୍ମାଣ ନେଇ ଅନେକ ପ୍ରସଙ୍ଗ ବି ରହିଛି । ମୁଖ୍ୟତଃ ପରିବେଶ ସୁରକ୍ଷା ପ୍ରସଙ୍ଗ । ତେବେ ପ୍ରଥମେ ଏକ କମିଟି ଆସି ସ୍ଥିତି ଅନୁଧ୍ୟାନ କରି ରିପୋର୍ଟ ପ୍ରସ୍ତୁତ କରିବେ । ପରେ ବିଭିନ୍ନ ଦିଗକୁ ନେଇ ସମୀକ୍ଷା ହେବ । ଯଦି ରାଜ୍ୟ ସରକାର କେନ୍ଦ୍ର ସରକାରଙ୍କୁ ସହଯୋଗ କରି ଏକ ଡିପିଆର୍ ପ୍ରସ୍ତୁତ କରିଦେବେ ବ୍ରିଜ ନିର୍ମାଣ କାର୍ଯ୍ୟ 50 ପ୍ରତିଶତ ଶେଷ ହେବ । ପରବର୍ତ୍ତୀ ପଦକ୍ଷେପ କେନ୍ଦ୍ର ସରକାର ନେବେ ।'' ତେବେ ସେ ଦିଲ୍ଳୀ ଯିବା ପରେ ଏହାର ବିଭାଗୀୟ ମନ୍ତ୍ରୀଙ୍କ ସହ ଆଲୋଚୋନା କରି ପଦକ୍ଷେପ ନେବେ ବୋଲି କେନ୍ଦ୍ରମନ୍ତ୍ରୀ କହିଛନ୍ତି ।
ଇଟିଭି ଭାରତ, ପୁରୀ
