ପୁରୀ: ଆଉ ଅଳ୍ପ ଦିନ ରହିଲା ରଥଯାତ୍ରା । ପୁରୀକୁ ଲକ୍ଷାଧିକ ଭକ୍ତ, ଯାତ୍ରୀ ଓ ପର୍ଯ୍ୟଟକଙ୍କ ସୁଅ ଛୁଟିବ । ତେବେ ଭକ୍ତ ଓ ପର୍ଯ୍ୟଟକଙ୍କ ସୁରକ୍ଷା ଓ ପୁରୀରେ ଶାନ୍ତିଶୃଙ୍ଖଳା ରକ୍ଷା ପାଇଁ କିଛି ହାର୍ଡକୋର ଅପରାଧୀଙ୍କୁ ବାନ୍ଧିଛି ପୁରୀ ପୋଲିସ । ବିଭିନ୍ନ ସଙ୍ଗୀନ ମାମଲାରେ ସମ୍ପୃକ୍ତ ଥିବା ଅପରାଧୀଙ୍କୁ ଗିରଫ କରିଛି ପୁରୀ ପୋଲିସ । ବାସେଳୀ ସାହି ଥାନା, କୁମ୍ଭାରପଡ଼ା ଥାନା, ବଳିଆପଣ୍ଡା ଥାନା ଓ ସମୁଦ୍ରକୂଳ ଥାନା ଅଞ୍ଚଳରେ ଚଢାଉ କରାଯାଇ ୧୦ ଜଣ ଦୁର୍ଦ୍ଦାନ୍ତ ଅପରାଧୀଙ୍କୁ ଗିରଫ କରାଯାଇଛି । ସେମାନଙ୍କ ଠାରୁ ଦୁଇଟି ଅଫୁଟା ବୋମା, ଗୋଟିଏ ଖଣ୍ଡା, ଲୁହା ରଡ଼, ମୋବାଇଲ, ୫ଟି ବିୟର ବୋତଲ ଓ କାଠ ଫାଳିଆ ଏବଂ ଦୁଇଟି ବାଇକ୍ ଜବତ କରାଯାଇଛି ।
ଗିରଫ ଅପରାଧୀଙ୍କ ମଧ୍ୟରୁ କେତେଜଣ ହତ୍ୟା ମାମଲାରେ ସମ୍ପୃକ୍ତ ଅଛନ୍ତି । ଗିରଫ ଅଭିଯୁକ୍ତ ସଦର ଥାନା କଣ୍ଠପୁରର ସନାତନ ପ୍ରଧାନ, ଅଶୋକ ପ୍ରଧାନ, ରେବତୀରମଣର କାହୁଁ ଭୋଇ । ସେହିପରି ୬ଟି ଭନ୍ନ ମାମଲାରେ ସମ୍ପୃକ୍ତ ଥିବା ବାସେଳୀସାହି ଜଗନ୍ନାଥ ବସ୍ତିର ରାଜା ସ୍ବାଇଁ, ପାର୍ବତୀପୁରର ଲକ୍ଷ୍ମୀଧର ଖଟେଇ ଗରଫ ହୋଇଛି । ଅନ୍ୟ ୫ଟି ମାମଲାରେ ସମ୍ପୃକ୍ତ ଥିବା ଲୋକନାଥ ରୋଡର ବୁଲା ଦାସ ଏବଂ ଭିନ୍ନ ୧୧ଟି ମାମଲାରେ ସାମିଲ ଥିବା ହାତୀଶାଳର ସନ୍ତୁ ଓରଫ ସନ୍ତୋଷ ଦାସ, ଲୋକନାଥ ରୋଡର ଅବିନାଶ ନାୟକ, ନରେନ୍ଦ୍ରକୋଣ ହରିଜନ ବସ୍ତିର ରୂପକ ନାୟକ ଓ ସମୁଦ୍ରକୂଳ ସିଟି ରୋଡର ଜି ରବି ରାଓ ଗିରଫ ହୋଇଛି ।