ପୁରୀ:ନିଆଁ ଲାଗି ପୋଡିଗଲା 8 ବଖରା ଘର, ନଷ୍ଟ ହେଲା ଲକ୍ଷାଧିକ ଟଙ୍କାର ସମ୍ପତ୍ତି । ଗାଁକୁ ରାସ୍ତା ନଥିବାରୁ ପହଞ୍ଚି ପାରିଲା ନାହିଁ ଦମକଳ ଗାଡି। କୋଣାର୍କ ଥାନା ଅନ୍ତର୍ଗତ କୁରୁଜଙ୍ଗ ପଞ୍ଚାୟତ ତାଳସୁଆଁ ଗାଁ ବାରିକ ସାହିରେ ଗତକାଲି ବିଳମ୍ବିତ ରାତିରେ ସର୍ଟସର୍କିଟ ଯୋଗୁଁ ନିଆଁ ଲାଗି 8 ବଖରା ଘର ଜଳିପୋଡି ପାଉଁଶ ହୋଇଯାଇଛି ।
ତାଳସୁଆଁ ଗାଁ ବାରିକ ସାହିର ବାବୁଲି ବାରିକ, ପ୍ରଶାନ୍ତ ବାରିକ ଓ ମନୋଜ ବାରିକ ତିନି ଭାଇ ଙ୍କ ଘରେ ବିଳମ୍ବିତ ରାତିରେ ନିଆଁ ଲାଗିଯାଇଥିଲା । ଫଳରେ ଲକ୍ଷାଧିକ ଟଙ୍କାର ବହୁମୂଲ୍ୟ ସମ୍ପତି, ଅସବାପତ୍ର, ନଗଦ ଟଙ୍କା, ସୁନା ଗହଣା ସହ ଅନେକ ଗୁଡିଏ ଜିନିଷ ପୋଡି ପାଉଁଶ ହୋଇଯାଇଛି । ତେବେ ପରିବାରର କୌଣସି ସଦସ୍ୟଙ୍କ କିଛି କ୍ଷତି ହୋଇନାହିଁ । ଗ୍ରାମବାସୀଙ୍କ ସହଯୋଗରେ ନିକଟସ୍ଥ ଚମ୍ପାହର ଅଗ୍ନିଶମ ବିଭାଗକୁ ଡକାଇ ଥିଲେ ।
ତେବେ ଗାଁକୁ ରାସ୍ତା ନଥିବା ଯୋଗୁଁ ଅଗ୍ନିଶମ ବିଭାଗ ଗାଡ଼ି ପ୍ରାୟ 1 ଘଣ୍ଟା 30 ମିନିଟ ଧରି ଗାଁ ଦାଣ୍ଡ ରେ ଅଟକି ରହିଥିଲା । ଫଳରେ ଗାଡି ପହଞ୍ଚିବା ବେଳକୁ ଘର ଜଳି ପାଉଁଶ ହୋଇଯାଇଥିଲା । ବିପନ୍ନ ମାନଙ୍କୁ ସରକାରୀ ସହାୟତା ପ୍ରଦାନ ପାଇଁ ଦାବି ସ୍ଥାନୀୟ ବାସିନ୍ଦା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
