ବର୍ଷାରେ ବୁଡିଲା ପ୍ରସିଦ୍ଧ ଅଲାରନାଥ ମନ୍ଦିର

ପ୍ରସିଦ୍ଧ ଅଲାରନାଥ ମନ୍ଦିରରେ ଆଣ୍ଠୁଏ ପାଣି ଭର୍ତ୍ତି ହେବା ସହ ମନ୍ଦିରର ଗର୍ଭଗୃହ ଛାତରୁ ପାଣି ଗଳୁଛି । ବାରମ୍ବାର ଏନେଇ ଅଭିଯୋଗ ପରେ ସରକାର ଏଥିପ୍ରତି କୌଣସି ପଦକ୍ଷେପ ନେଉନଥିବା ଦେଖାଦେଇଛି ।

ବ୍ରହ୍ମଗିରି: ଲଘୁଚାପ ଜନିତ ଲଗାଣ ବର୍ଷାରେ ଉବୁଟୁବୁ ବ୍ରହ୍ମଗିରି । ଏହି କ୍ରମରେ ପ୍ରସିଦ୍ଧ ଅଲାରନାଥ ମନ୍ଦିରରେ ଆଣ୍ଠୁଏ ପାଣି ଭର୍ତ୍ତି ହେବା ସହ ମନ୍ଦିରର ଗର୍ଭଗୃହ ଛାତରୁ ପାଣି ଗଳୁଛି । ଯଦ୍ବାରା ଗର୍ଭ ଗୃହ ଭିତରେ ଲହଡୀ ଭାଙ୍ଗୁଛି ବର୍ଷାପାଣି । ତଥାପି ପାଣିରେ ପଶି ଶ୍ରଦ୍ଧାଳୁ ଅଲାରନାଥଙ୍କ ଦର୍ଶନ ପାଇଁ ଯାଉଥିବାର ଦୃଶ୍ୟ ଦେଖିବାକୁ ମିଳୁଛି ।

ତେବେ ଅସରାଏ ବର୍ଷାରେ ସର୍ବଦା ଅଲାରନାଥ ମନ୍ଦିରରେ ପାଣି ଜମୁଥିବାର ଅଭିଯୋଗ ହୋଇଛି । ତଥାପି ସରକାର ଏଥିପ୍ରତି କୌଣସି ପଦକ୍ଷେପ ନେଉନଥିବା ଦେଖାଦେଇଛି ।

ଗତବର୍ଷ ନବକଳେବର ସମୟରେ ଅଲାରନାଥ ମନ୍ଦିର ଉନ୍ନତି ପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଇଥିଲା । ହେଲେ ମନ୍ଦିରରେ ସଠିକ ଉନ୍ନତିମୂଳକ କାର୍ଯ୍ୟ ନକରି ନେତା, ଠିକାଦାର ମିଶି ଏସବୁ ଟଙ୍କାକୁ ଚଳୁ କରି ଦେଇଥିବା ଅଭିଯୋଗ ହୋଇଛି ।

ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ