ପୁରୀ: ଶ୍ରୀମନ୍ଦିର ଉପରେ ଡ୍ରୋନ୍ ଉଡାଇ ୟୁଟ୍ୟୁବର ଅନିମେଶ ଚକ୍ରବର୍ତ୍ତୀ ଗିରଫ ହୋଇଛନ୍ତି । କୋଲକାତାରୁ ତାଙ୍କୁ ଗିରଫ କଲା ପୁରୀ ପୋଲିସ । ଶ୍ରୀମନ୍ଦିର ନୀଳଚକ୍ର ଉପରେ ଡ୍ରୋନ ଉଡାଇବା ମାମଲାରେ ଅଭିଯୁକ୍ତ ଥିଲେ ଅନିମେଶ । ଡ୍ରୋନ ଉଡାଇବା ନେଇ ଓଡ଼ିଶା ପୋଲିସକୁ ସ୍ୱତନ୍ତ୍ର ଧନ୍ୟବାଦ ଦେଇଥିଲେ ଅନିମେଶ । ଯାହାକୁ ନେଇ ପୋଲିସର କାର୍ଯ୍ୟାନୁଷ୍ଠାନ ନେଇ ସନ୍ଦେହ ସୃଷ୍ଟି ହୋଇଥିଲା । ପରେ ପୋଲିସ ଡ୍ରୋନ ଉଡାଇବା ନେଇ କୌଣସି ଅନୁମତି ଦେଇନଥିବା ନେଇ ସ୍ପଷ୍ଟ କରିଥିଲା । ତେବେ ଏହି ଘଟଣାରେ ଅନିମେଶକୁ ଗିରଫ କରାଯାଇଥିବା ନେଇ ଟୁଇଟ ଯୋଗେ ସୂଚନା ଦେଇଛି ପୁରୀ ପୋଲିସ ।
ଘଟଣାକୁ ନେଇ ଏତଲା ହେବା ପରେ ଡ୍ରୋନ ଉଡାଇଥିବା ୟୁଟ୍ୟୁବର ନିଜ ୟୁଟ୍ଯୁବ ଚ୍ୟାନେଲରେ କ୍ଷମା ପ୍ରାର୍ଥନା ମଧ୍ୟ କରିଥିଲେ । ଏହାକୁ ନେଇ ପୁରୀ ସିଟି DSPଙ୍କ ରିପୋର୍ଟ ଆଧାରରେ ସିଂହଦ୍ଵାର ଥାନାରେ ଏତଲା ରୁଜ୍ଜୁ ହୋଇଥିଲା । ଶ୍ରୀମନ୍ଦିର ଉପରେ ଡ୍ରୋନ ଉଡାଇ ଭିଜୁଆଲ ଭାଇରାଲ କରିବା ପ୍ରସଙ୍ଗରେ ଡିଏସପିଙ୍କ ରିପୋର୍ଟ ଆଧାରରେ ସିଂହଦ୍ୱାର ଥାନାରେ ପୋଲିସ କେସ୍ ନମ୍ବର ୧୫୦ରେ ମୋକଦ୍ଦମା ରୁଜ୍ଜୁ କରିଥିଲା ।
ଏହାବି ପଢନ୍ତୁ- ଶ୍ରୀମନ୍ଦିର ଉପରେ ଉଡିଲା ଡ୍ରୋନ, ସୁରକ୍ଷା ନେଇ ପ୍ରଶ୍ନବାଚୀ
ଅଭିଯୁକ୍ତ ଅନିମେଶ ଚୌଧୁରୀ ପଶ୍ଚିମବଙ୍ଗ ଗୁମା ଅଞ୍ଚଳର ବାସିନ୍ଦା ବୋଲି ଜଣା ପଡ଼ିଛି । ଅଭିଯୁକ୍ତକୁ ପୋଲିସ 160 ସିଆରସିପି ଅଧୀନରେ ନୋଟିସ ଦିଆଯାଇଥିଲା । ନୋଟିସ ଅନୁଯାୟୀ ଜେରା ପାଇଁ ସିଂହଦ୍ଵାର ଥାନାରେ ହାଜର ହେବା ପାଇଁ ନିର୍ଦ୍ଦେଶ ଦିଆଯାଇଥିଲା । ଏହାସହ ପୁରା ଘଟଣାର ତଦନ୍ତ ପାଇଁ ତିନିଜଣ ଅଧିକାରୀଙ୍କୁ ନେଇ ଟିମ୍ ଗଠନ କରାଯାଇଥିଲା । ଯାହାର ନେତୃତ୍ବ ପୁରୀ ସିଟି DSPଙ୍କୁ ଦିଆଯାଇଥିଲା ।