ପୁରୀ:ଆଜି ପବିତ୍ର ଅଁଳା ନବମୀ । ଶ୍ରୀରାଧାଙ୍କ ପାଦ ଦର୍ଶନ ପାଇଁ ଚଳଚଞ୍ଚଳ ହୋଇଉଠିଛି ସାକ୍ଷୀଗୋପିନାଥ ମନ୍ଦିର । ଭଗବାନ କୃଷ୍ଣଙ୍କ ନଟବର ବେଶ ଓ ରାଧାରାଣୀଙ୍କ ଓଡିଆଣୀ ବେଶ ବା ରାଧାପାଦ ଦର୍ଶନ କରିବାର ସୁଯୋଗ ପାଉଛନ୍ତି ଶ୍ରଦ୍ଧାଳୁ । କାର୍ତ୍ତିକ ଶୁକ୍ଳ ପକ୍ଷ ନବମୀ ତିଥିରେ ଏହି ଅନନ୍ୟ ଦିନକୁ ଚାହିଁ ରହିଥିବା ଭକ୍ତର ମନୋବାଞ୍ଛା ପୂର୍ଣ୍ଣ ହୋଇଛି । ଏନେଇ ସାକ୍ଷୀଗୋପାଳରେ ଥିବା ସାକ୍ଷୀଗୋପିନାଥ ମନ୍ଦିରରେ ହଜାର ହଜାର ଶ୍ରଦ୍ଧାଳୁଙ୍କ ଭିଡ ଲାଗିଛି । ରାଧାପାଦ ଦର୍ଶନ ପାଇଁ ଧାଡି ବନ୍ଧି ଛିଡା ହୋଇଛନ୍ତି ଭକ୍ତ ।
ତେବେ ଗତକାଲି ମଧ୍ୟରାତ୍ରିରୁ ମନ୍ଦିର ଦ୍ୱାର ଫିଟା ନୀତି ସହ ଅନ୍ୟ ନୀତି ଅନୁଷ୍ଠିତ ହୋଇଛି । ରାତି 3ଟାରୁ ଦର୍ଶନ ଆରମ୍ଭ ହୋଇଛି । ପବିତ୍ର ଅଁଳା ନବମୀରେ ବର୍ଷକରେ କେବଳ ଏହି ଗୋଟିଏ ଦିନରେ ହିଁ ଶ୍ରୀରାଧା ରାଣୀଙ୍କ ପାଦ ଦର୍ଶନର ସୌଭାଗ୍ୟ ଲାଭ କରନ୍ତି ଭକ୍ତ । ରାଧା ପାଦ ଦର୍ଶନ ପାଇଁ ରାଜ୍ୟ ତଥା ରାଜ୍ୟ ବାହାରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ । ଏହାକୁ ଦୃଷ୍ଟିରେ ରଖି ପୁରୀ ଜିଲ୍ଲା ପ୍ରଶାସନ ପ୍ରସ୍ତୁତି କରିଛି । ସାକ୍ଷୀଗୋପାଳକୁ ଉତ୍ତର ଭାରତ ଅଞ୍ଚଳରୁ ପ୍ରଭୁ ସାକ୍ଷୀଗୋପୀନାଥ ଓ ଶ୍ରୀ ରାଧାରାଣୀ ଆସିଥିବାରୁ ଠାକୁରାଣୀ ଶ୍ରୀରାଧାରାଣୀ ଉତ୍ତର ଭାରତୀୟ ବେଶଭୂଷା ପରିଧାନ କରିଥାନ୍ତି ।
ଫଳରେ ବର୍ଷ ସାରା ଠାକୁରାଣୀଙ୍କ ପାଦ ପିନ୍ଧା ବସ୍ତ୍ରରେ ଆବୃତ୍ତ ହୋଇ ରହିଥାଏ । ତେବେ ପବିତ୍ର ଅଁଳା ନବମୀ ତିଥିରେ ଗୋଟିଏ ଦିନ ଲାଗି ଠାକୁରାଣୀ ଶ୍ରୀରାଧା ରାଣୀ ଓଡ଼ିଆଣୀ ବେଶ ହୋଇଥାନ୍ତି । ଫଳରେ ଠାକୁରାଣୀଙ୍କ ପିନ୍ଧା ବସ୍ତ୍ର ପାଦ ଉପରକୁ ରହିଥାଏ ଏବଂ ଭକ୍ତମାନଙ୍କୁ ପାଦପଦ୍ମ ଦେଖିବାର ସୁଯୋଗ ମିଳିଥାଏ । ତେବେ ଏହି ବେଶ ଦର୍ଶନ ପାଇଁ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ମନ୍ଦିର ସିଂହଦ୍ଵାର ସମ୍ମୁଖରେ ୩ ଥାକିଆ ବାଉଁଶ ବ୍ୟାରିକେଡର ନିର୍ମାଣ ହୋଇଛି । ଭକ୍ତମାନେ ଧାଡ଼ିରେ ଆସି ବ୍ୟାରିକେଡ୍ ମଧ୍ୟରେ ଯାଇ ଦର୍ଶନ କରୁଛନ୍ତି । ପ୍ରଶାସନ ତରଫରୁ ମନ୍ଦିର ପରିସର ଓ ସିଂହଦ୍ଵାର ସମ୍ମୁଖରେ ସିସିଟିଭି ଲଗାଯାଇଥିବା ବେଳେ 20 ପ୍ଲାଟୁନ ପୋଲିସ ମୁତୟନ କରାଯାଇଛି ।