ପୁରୀ ଅର୍ବାନହାଟକୁ ବିଜୁ ସଂଗ୍ରହାଳୟ କରିବା ନେଇ ଦାବି

ପୁରୀ ଅର୍ବାନହାଟକୁ ବିଜୁ ସଂଗ୍ରହାଳୟ କରିବା ନେଇ ଦାବି ଜୋର ଧରିଛି । ଗୁରୁବାର ବିଜୁବାବୁଙ୍କ ଜୟନ୍ତୀ ଅବସରରେ ଏଭଳି ଦାବି ଉଠାଇଛି ଶ୍ରୀଜଗନ୍ନାଥ ସେନା । ପଢନ୍ତୁ ସମ୍ପୂର୍ଣ୍ଣ ରିପୋର୍ଟ...

ପୁରୀ: ଶ୍ରୀକ୍ଷେତ୍ରରେ ଅବସ୍ଥିତ ଅର୍ବାନ ହାଟକୁ ରାଜ୍ୟ ସରକାର ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସ୍ମୃତି ନିମନ୍ତେ ବିଜୁ ସଂଗ୍ରହାଳୟ ନାମରେ ପ୍ରତିଷ୍ଠା କରନ୍ତୁ । ବିଜୁ ବାବୁଙ୍କ ପ୍ରିୟ ଡାକୋଟା ବିମାନକୁ କଲିକତାରୁ ମଧ୍ୟ ଆଣି ଅର୍ବାନ ହାଟରେ ରଖାଯାଉ । ଏହାସହ ମହାନ ଜନ ନାୟକ ବିଜୁ ପଟ୍ଟନାୟକ ସ୍ମୃତି ଉଦ୍ଦେଶ୍ୟ ଏକ ସଂଗ୍ରହାଳୟରେ ମଧ୍ୟ ସ୍ଥାପନ କରାଯାଉ ବୋଲି ଦାବି କରିଛି ଶ୍ରୀଜଗନ୍ନାଥ ସେନା ।

ସ୍ବର୍ଗ ଦ୍ବାରରୁ ବିଜୁ ବାବୁଙ୍କ ସମାଧି ପୀଠ ଉଚ୍ଛେଦ ହେବା ପରେ ଶ୍ରୀଜଗନ୍ନାଥ ସେନା ପକ୍ଷରୁ ସେଠାରେ ଥିବା ବିଜୁ ବାବୁଙ୍କ ଅବଶେଷ, ପାଉଁଶ ଆଣି ଅର୍ବାନ ହାଟରେ ସ୍ଥାପନ କରାଯାଇଛି । ଗୁରୁବାର ବିଜୁ ବାବୁଙ୍କ ଜୟନ୍ତୀ ଅବସରରେ ସେଠାରେ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ