ପୁରୀ: ଫନି ତାଣ୍ଡବରେ ସବୁକିଛି ଛାରଖାର ହୋଇଛି । ତୁହାକୁ ତୁହା ବର୍ଷା ଓ ସାଂଘାତିକ ବେଗରେ ମାଡି ଆସୁଥିବା ପବନ ପୁରୀରେ ରଚିଥିଲା ପ୍ରଳୟ । ଏଥିରୁ କୋଟିକୋଟି ଓଡିଆଙ୍କ ଆରାଧ୍ୟ ଦେବତାଙ୍କ ଶ୍ରୀମନ୍ଦିର ଶ୍ରୀ ମଧ୍ୟ ଖିନଭିନ ହୋଇଥିବାବେଳେ ବର୍ତ୍ତି ପାରିନି ପୁରୀ ଡେଲାଙ୍ଗ ବ୍ଲକର କୃଷିକ୍ଷେତ । ବଡ ବଡ ଗଛ, ଇଲେଟ୍ରି ଖୁଣ୍ଟ ଧରାଶାୟୀ ହୋଇଥିବାବେଳେ ଉଜୁଡି ଯାଇଛି ଚାଷୀଙ୍କ ରବି ଫସଲ । ସବୁକିଛି ହରାଇ ଏବେ ହତାଶ ହୋଇଥିବା ଚାଷୀକୁ ଘାରିଛି ଚିନ୍ତା ।
ଭିଡିଓ ସୌଜନ୍ୟ: ପ୍ରତିନିଧି, ପୁରୀ ମହାବାତ୍ୟା ଫନି ସବୁକିଛି ନଷ୍ଟ କରିଦେଇ ଚାଲିଯାଇଛି । ଆଉ ଫନି ଚାଲିଗଲା ପରେ ଛାଡି ଯାଇଛି ଧ୍ୱଂସ ବିଧଂସ ଚିତ୍ର । କେଉଁଠି ଫସଲ ପାଣିରେ ତ ଆଉ କେଉଁଠି ଅମଳ ଫସଲରେ ପାଣି ଲାଗି ଗଜା ହୋଇଯାଇଛି । ରବି ଫସଲ କରି କିଛି ଲାଭ ପାଇବାକୁ ଆଶା ରଖିଥିବା ଚାଷୀ ଏବେ ହତାଶ ହୋଇଛନ୍ତି । ଫନି ମାଡରେ ଅମଳ ଫସଲରେ ମଧ୍ୟ ଫିମ୍ପି ଲାଗିଯାଇଛି । ଆଉ ସେଥିରୁ ଯେତିକି ବର୍ତି ଯାଇଛି, ତାକୁ ଖରାରେ ଶୁଖାଉଛନ୍ତି ଚାଷୀ । ମୁଗ ଓ ବିରି ଭଳି ବାଦାମ ଫସଲ ମଧ୍ୟ ଫନି ପ୍ରଭାବରେ ଜଳାର୍ଣ୍ଣବ ହୋଇଛି ।
ପୁରୀରୁ ଗୋବିନ୍ଦଚନ୍ଦ୍ର ପଣ୍ଡା, ଇଟିଭି ଭାରତ
