ପୁରୀ: ଜିଲ୍ଲାରେ ଫନି ସହାୟତା କେଳେଙ୍କାରୀ ପରେ ଏବେ ସାମ୍ନାକୁ ଆସିଛି ଆଉ ଏକ ନୂଆ ଘଟଣା । ଫନି ସମୟରେ ବିଭିନ୍ନ ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତର ହୋଇଥିବା ବିପନ୍ନଙ୍କୁ ରନ୍ଧା ଖାଦ୍ୟ ଯୋଗାଇ ଦେବାରେ ନାଁରେ ଲକ୍ଷ ଲକ୍ଷ ଟଙ୍କା ଲୁଟ କରାଯାଇଛି । ଦିନେ ଦୁଇଦିନ ରନ୍ଧା ଖାଦ୍ୟ ଯୋଗାଇ ଦେଇ 8ରୁ 10 ଦିନର ବିଲ କରି ନେଇଛନ୍ତି ବିଭାଗୀୟ ଅଧିକାରୀ।
ଶହେ ଲୋକ ରହିବାର ସାମର୍ଥ୍ୟ ନଥିବା ଆଶ୍ରୟ ସ୍ଥଳୀରେ 3 ଶହ ଲୋକ ରହିବାର ଦର୍ଶାଯାଇଛି।ସୂଚନା ଅଧିକାର ଆଇନ ବଳରେ ହାସଲ ହୋଇଥିବା ତଥ୍ୟରେ ଜଣାପଡିଛି ଅସ୍ତରଙ୍ଗ ବ୍ଲକରେ 8 ଦିନ ରନ୍ଧା ଖାଦ୍ୟ ବଣ୍ଟନ କରାଯାଇ 68 ଲକ୍ଷ ଟଙ୍କା ଖର୍ଚ୍ଚ ହୋଇଛି। ଯେତେବେଳେ କି ବାତ୍ୟା ଆଶ୍ରୟ ସ୍ଥଳରେ ଥିବା ଲୋକେ ଅଭିଯୋଗ କରିଛନ୍ତି ମାତ୍ର ଦିନେ କି ଦୁଇ ଦିନ ରନ୍ଧା ଖାଦ୍ୟ ଯୋଗାଇ ଦିଆଯାଇଥିଲା।