ଶ୍ରୀମନ୍ଦିର ପରିସରରେ ଅନୁକୂଳ ହେଲା ରଥ ନିର୍ମାଣ କାର୍ଯ୍ୟ ଓ ଚନ୍ଦନ ଯାତ୍ରା

କୋରୋନା ପ୍ରକୋପ ଓ ଲକଡାଉନ କଟକଣା ସତ୍ତ୍ବେ ଚଳିତ ବର୍ଷ ଶ୍ରୀମନ୍ଦିରରେ ମହାପ୍ରଭୁଙ୍କ ରଥ ନିର୍ମାଣ ଅନୁକୂଳ ଏବଂ ଚନ୍ଦନ ଯାତ୍ରା ସବୁ କିଛି ପରମ୍ପରା ମୁତାବିକ ହୋଇଛି । ହେଲେ ଏସବୁ ପୂଜା ବିଧି ମନ୍ଦିର ବାହାରେ ନ ହୋଇ ମନ୍ଦିର ପରିସରରେ କରାଯାଇଛି । ତେବେ ମନ୍ଦିର ଭିତରେ କିଭଳି ରଥ ନିର୍ମାଣ ଅନୁକୁଳ ଓ ଚନ୍ଦନଯାତ୍ରା ମହାପ୍ରଭୁଙ୍କ ଶୁଭାରମ୍ଭ ହୋଇଛି ସେ ନେଇ ଆସନ୍ତୁ ଶୁଣିବା ଦେଉଳ ପୁରୋହିତ ଓ ବିଶ୍ୱକର୍ମା ମହାରଣାଙ୍କ ମୁହଁରୁ...

ପୁରୀ: ରବିବାର ପାଳନ ହୋଇଛି ପବିତ୍ର ଅକ୍ଷୟ ତୃତୀୟା । ଏହି ଦିନର ପରମ୍ପରା ଅନୁଯାୟୀ ପୁରୀରେ ମହାପ୍ରଭୁଙ୍କ ରଥ ନିର୍ମାଣ ଅନୁକୁଳ ହୋଇଛି । ହେଲେ ଚଳିତ ବର୍ଷ ରଥ ଖଳାରେ ରଥ ନିର୍ମାଣ ଅନୁକୁଳ ନ ହୋଇ ଶ୍ରୀମନ୍ଦିର ଭିତରେ ହୋଇଛି । ସ୍ନାନ ମଣ୍ଡପ ନିକଟରେ ଏହି ରଥ ନିର୍ମାଣ ଅନୁକୂଳ କରାଯାଇଛି ।

ଦେଉଳ ପୁରୋହିତ ଓ ବ୍ରାହ୍ମଣଙ୍କ ଉପସ୍ଥିତିରେ ବନ ଜାଗ ପଦ୍ଧତିରେ ରଥ ନିର୍ମାଣ କାର୍ଯ୍ୟ ଅନୁକୂଳ ହୋଇଛି । ମହାରଣା ସେବକମାନେ ମଧ୍ୟ ପାରମ୍ପରିକ ପୂଜାର୍ଚ୍ଚନା କରିଥିଲେ ।

ଅନ୍ୟପଟେ ମହାପ୍ରଭୁଙ୍କ ଅକ୍ଷୟ ତୃତୀୟା ଠାରୁ ଆରମ୍ଭ ହେଉଥିବା ଚନ୍ଦନ ଯାତ୍ରା ବି ଏଥର ଶ୍ରୀମନ୍ଦିର ଭିତରେ ହୋଇଛି । ମନ୍ଦିର ଭିତରେ ଜଳ କ୍ରୀଡା ମଣ୍ଡପ କରାଯାଇଛି । ଚଳିତ ବର୍ଷ କୋରୋନା ଭୟ ଓ ଲକଡାଉନ କଟକଣା ଯୋଗୁଁ ଏହି ସବୁ ପରମ୍ପରାକୁ ବନ୍ଦ କରାନଯାଇ ବରଂ ଭିନ୍ନ ଢଙ୍ଗରେ ପାଳନ କରାଯାଇଛି । ମହାପ୍ରଭୁଙ୍କ ସମସ୍ତ କାର୍ଯ୍ୟକ୍ରମ ଶ୍ରୀମନ୍ଦିର ବାହାରେ ନ ହୋଇ ଶ୍ରୀମନ୍ଦିର ଭିତରେ ଆୟୋଜିତ ହୋଇଛି ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ