ନୂଆପଡା: ଏକତରଫା ପ୍ରେମରୁ ଯୁବକଙ୍କ ଉନ୍ମତ୍ତ କାଣ୍ଡ । ପ୍ରେମ ନିବେଦନ ବିଫଳ ହେବାରୁ ଦୁଇ ଯୁବତୀଙ୍କୁ ଛୁରାମାଡ କରି ଲହୁଲୁହାଣ କଲା ପ୍ରେମିକ । ବୋଡେନ ଥାନା ବୋଇରଗାଁ ଇମ୍ପେରୀୟଲ ସ୍କୁଲ ଛିକଟରେ ଘଟିଛି ଏହି ଅଭାବନୀୟ ଘଟଣା । ଦୁଇ ଯୁବତୀଙ୍କୁ ଗୁରୁତର ଅବସ୍ଥାରେ ବୋଡେନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ଯୁବତୀ ଦ୍ବୟ ବୋଡେନ ଥାନା ଚିକଲଛୁଆଁ ଗାଁର ହୋଇଥିବା ବେଳେ ଅଭିଯୁକ୍ତ ପ୍ରେମିକ ଗୋଇର ଗାଁର 42 ବର୍ଷୀୟ ଲଳିତ ନାଏକ ବୋଲି ଜଣାପଡିଛି ।
ସୂଚନାଯୋଗ୍ୟ, ଚିକଲଛୁଆଁ ଗାଁର ଦୁଇ ଯୁବତୀ ଡ୍ରେସ ଓ କିଛି ପ୍ରସାଧନ ସାମଗ୍ରୀ କିଣିବା ପାଇଁ ବୋଡେନ ଗ୍ରାମକୁ ଆସିଥିଲେ । ଡ୍ରେସ କିଣି ନିଜ ଗାଁକୁ ଫେରୁଥିବା ସମୟରେ ବାଟରେ ଯୁବକଟି ଜଗି ରହିଥିଲା । ସେ ଜଣେ ଯୁବତୀଙ୍କୁ ଜୋର ଜବରଦସ୍ତ ଟେକି ନେବାକୁ ଚେଷ୍ଟା କରୁଥିବା ସମୟରେ ସଂପୃକ୍ତ ଯୁବତୀଙ୍କ ସାଙ୍ଗ ତାଙ୍କୁ ବାଧା ଦେଇଥିଲା । ଫଳରେ ଯୁବକଟି ଉତକ୍ଷିପ୍ତ ହୋଇ ଏକ ଧାରୁଆ ଛୁରୀରେ ଦୁଇ ଜଣଙ୍କ ଉପରେ ମରଣାନ୍ତକ ଆକ୍ରମଣ କରିଥିଲା । ତେବେ ଅଭିଯୁକ୍ତ ଯୁବକ ଜଣକ ବିବାହିତ ହୋଇଥିବା ଜଣାପଡିଛି । ପୀଡିତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ଏ ସମ୍ପର୍କରେ ଅଭିଯୋଗ ପରେ ବୋଡେନ ପୋଲିସ ତଦନ୍ତ ଚଳାଇଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
