ନୂଆପଡା: ନ୍ୟାସନାଲ ଫ୍ରଣ୍ଟ ଅଫ ଇଣ୍ଡିଆନ ଟ୍ରେଡ଼ ୟୁନିୟନ ଆହ୍ବାନରେ ଗୁରୁବାର ନୂଆପଡା ଜିଲ୍ଲା ଶାଖା ସଭାପତି ଯଦୁମଣି ପାଣିଗ୍ରାହୀଙ୍କ ନେତୃତ୍ୟରେ ମହାମହିମ ରାଷ୍ଟ୍ରପତି, ପ୍ରଧାନ ମନ୍ତ୍ରୀ, ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କୁ 10 ଦଫା ଦାବିପତ୍ର ନୂଆପଡା ଜିଲ୍ଳାପାଳ ମଧୁସ୍ମିତା ସାହୁଙ୍କ ଜରିଆରେ ପ୍ରଦାନ କରିଛନ୍ତି ।
ଦାବିପତ୍ରରେ ସରକାରଙ୍କ ଶ୍ରମିକ ମାରଣା ନୀତିକୁ ସମାଲୋଚନା କରିବା ସହ କଡାକଡି ଭାବରେ ୟୁନିୟନ ବିରୋଧ କରିଛି ଏବଂ ଆଇନକୁ ସଂଶୋଧନ କରିବାପାଇଁ ୟୁନିୟନ ଚେତାବନୀ ଦେଇଛି । 1 ଲକ୍ଷ 20 ହଜାର ନିର୍ମାଣ ଶ୍ରମିକ ପଞ୍ଜିକୃତ ହୋଇଥିବାବେଳେ, ସେଥିମଧ୍ୟରୁ 72 ହଜାର ଶ୍ରମିକଙ୍କୁ ସରକାର ଭତ୍ତା ପ୍ରଦାନ କରିଛନ୍ତି । ବାକିତକ 32 ହଜାର ଶ୍ରମିକଙ୍କୁ ଭତ୍ତା ଯୋଜନାରେ ସାମିଲ କରି ତୁରନ୍ତ ଭତ୍ତା ପ୍ରଦାନ ପାଇଁ ୟୁନିୟନ ଦାବି କରିଛି ।
ସେହିଭଳି ନୂଆପଡା ଜିଲ୍ଲା ଏକ ଦାଦନ ପ୍ରବଣ ଜିଲ୍ଲା ଭାବରେ ରାଜ୍ୟରେ ବେଶ ପରିଚିତ । ମହାମାରୀ କୋଭିଡ-19ରେ ରାଜ୍ୟ ବାହାରେ ଫସିରହିଛନ୍ତି ପାଖାପାଖି 75 ହଜାର ନୂଆପଡା ଜିଲ୍ଲାର ପ୍ରବାସୀ ଓଡିଆ ଶ୍ରମିକ । ସେଥିମଧ୍ୟରୁ କେବଳ 5 ରୁ 6 ଜଣ ଶ୍ରମିକଙ୍କୁ ଉଦ୍ଧାର କରିଛି ନୂଆପଡା ଜିଲ୍ଲା ପ୍ରଶାସନ । ଏନେଇ ବାକିତକ ଶ୍ରମିକଙ୍କୁ ତୁରନ୍ତ ଉଦ୍ଧାର କରିବାକୁ ୟୁନିୟନ ଦାବିକରିଛି ।