ନୂଆପଡ଼ା: ସଭିଏଁ ପଢିବା ସଭିଏଁ ବଢିବା ଏଭଳି କିଛି ସ୍ଲୋଗାନ ଦେଇ ସାରା ଭାରତ ବର୍ଷରେ ରାଇଟଟୁ ଏଜୁକେସନ ACT ଲାଗୁକଲେ ସରକାର । ନିୟମ ଆଧାରରେ 6 ରୁ 14 ବର୍ଷର ସମସ୍ତ ଛାତ୍ରଛାତ୍ରୀ ବାଧ୍ୟତାମୂଳକ ଭାବରେ ଶିକ୍ଷା ପାଇବାର ଅଧିକାର ରହିଛି । ହେଲେ ଏହି ନିୟମ ନୂଆପଡା ଗୋଡଧୁଆପଦର ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଫେଲ ମାରିଛି । ଆବଶ୍ୟକୀୟ ଶିକ୍ଷକ ଅଭାବରୁ ପିଲାଙ୍କ ପାଠପଢ଼ା ବିପର୍ଯ୍ୟସ୍ତ ହୋଇପଡିଛି । ବିଦ୍ୟାଳୟରେ ପ୍ରଥମରୁ ନବମ ଶ୍ରେଣୀ ଯାଏଁ ଶ୍ରେଣୀ ରହିଛି । ହେଲେ ଛାତ୍ରଛାତ୍ରୀଙ୍କୁ ପାଠ ପଢ଼ାଇବା ପାଇଁ ଅଛନ୍ତି ମାତ୍ର 4 ଜଣ ଶିକ୍ଷକ । ଫଳରେ ପାଠ ପଢାରେ ଅସୁବିଧାର ସମ୍ମୁଖିନ ହେଉଛନ୍ତି ଛାତ୍ରଛାତ୍ରୀ ।
ଚଳିତ ଶିକ୍ଷା ବର୍ଷ 2022ରେ ଏଠିକାର ଉପସ୍ଥାନ ଓ ଅନ୍ୟାନ୍ୟ ଆନୁସଙ୍ଗିକ ବ୍ୟବସ୍ଥାକୁ ଦୃଷ୍ଟିରେ ରଖି ଏହି ବିଦ୍ୟାଳୟକୁ ଅପ ଗ୍ରେଡଟ କରି ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ଭାବରେ ଘୋଷଣା କଲେ ସରକାର । ବର୍ତ୍ତମାନ ପ୍ରଥମରୁ ନବମ ଶ୍ରେଣୀ ପର୍ଯ୍ୟନ୍ତ ଶତାଧିକ ଛାତ୍ରଛାତ୍ରୀ ନାମ ଲେଖାଇଛନ୍ତି । ହେଲେ ପୂର୍ବରୁ ଯେଉଁ 4 ଜଣ ଶିକ୍ଷକ ଥିଲେ ସେମାନଙ୍କ ଉପରେ ଅଷ୍ଟମ ନବମ ଶ୍ରେଣୀ ପଢାଇବା ଦାୟିତ୍ବ ନ୍ୟସ୍ତ କରିଛନ୍ତି ସରକାର । ଅପ ଗ୍ରେଡଟ ବିଦ୍ୟାଳୟ ଅନୁସାରେ ଅଷ୍ଟମ ନବମ ଶ୍ରେଣୀକୁ ପାଠ ପଢ଼ାଇବା ପାଇଁ ଏଯାଏଁ ଶିକ୍ଷକ ଦିଆଯାଇନାହିଁ । ଫଳରେ ପାଠପଢ଼ା ବିପର୍ଯ୍ୟସ୍ତ ହୋଇପଡିଛି ।