ନୂଆପଡା:ଜିଲ୍ଲା ସଦର ମହକୁମା ଠାରୁ 70 କିଲୋମିଟର ଦୂରରେ ଅବସ୍ଥିତ ଜିଲ୍ଲାର ପ୍ରାଣକେନ୍ଦ୍ର କୁହାଯାଉଥିବା ଖଡ଼ିଆଳ ଗାଁ । ଏହି ଗାଁରେ ଥିବା ଖଡ଼ିଆଳ ବ୍ଲକ କାର୍ଯ୍ୟାଳୟକୁ ଲାଗି ରହିଛି ଗଡ୍ରାମୁଣ୍ଡା ଗ୍ରାମପଞ୍ଚାୟତ ଫୋକଟପଡା। ଯାହାକି ଗଡ୍ରାମୁଣ୍ଡା ଗ୍ରାମପଞ୍ଚାୟତର ଏକ ବଡ ଜନବସତି ଅଟେ। ଦୀପ ତଳ ଅନ୍ଧାର ସଦୃଶ ଫୋକଟପଡା ଜନବସତିରେ ପରିମଳ ବ୍ୟବସ୍ଥା ନକହିବା ଭଲ । ଡ୍ରେନ ଭାଙ୍ଗି ରାସ୍ତାରେ ମିଶିଯାଇଥିବାବେଳେ ଦୂଷିତ ଦୂର୍ଗନ୍ଧ ମଇଳା ପାଣି ରାସ୍ତାରେ ଭାସୁଛି। ସେହି ପାଣି ଉପରେ ପିଲା ଠାରୁ ବୁଢା ପର୍ଯ୍ୟନ୍ତ ସମସ୍ତେ ଯାତାୟତ କରୁଛନ୍ତି। ଫଳରେ ଦୁର୍ଗନ୍ଧରେ ଅଣନିଃଶ୍ବାସୀ ହୋଇପଡୁଛନ୍ତି ପଡାବାସୀ । ଏଥି ସହ ବିଭିନ୍ନ ରୋଗର ଶିକାର ମଧ୍ୟ ହେଉଥିବା ଅଭିଯୋଗ ହୋଇଛି ।
ଖଡ଼ିଆଳ ବ୍ଲକ ଅଧିନସ୍ଥ ଗଡ୍ରାମୁଣ୍ଡା ଗ୍ରାମପଞ୍ଚାୟତରେ 13 ଗୋଟି ୱାର୍ଡ ଏବଂ 3 ହଜାର ଲୋକ ବସବାସ କରନ୍ତି । ଗ୍ରାମପଞ୍ଚାୟତ ନିର୍ବାଚିତ ପ୍ରତିନିଧି ଠୁ ଆରମ୍ଭ କରି ଗ୍ରାମପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ନିଷ୍କ୍ରିୟତା କାରଣରୁ ଫୋକଟପଡା ନିବାସୀ ଅସ୍ବାସ୍ଥ୍ୟକର ପରିବେଶ ମଧ୍ୟରେ ଅଣନିଃଶ୍ଵାସୀ ହୋଇପଡିଛନ୍ତି। ଏହି ସମସ୍ୟାକୁ ନେଇ ବାରମ୍ବାର ଲିଖିତ ଆକାରରେ ଜଣାଇବା ପରେ ମଧ୍ୟ ସରପଞ୍ଚ, ବିଡ଼ିଓ, ୱାର୍ଡ ମେମ୍ବର କେହି ମଧ୍ୟ କର୍ଣ୍ଣପାତ କରୁନଥିବା ପଡାବାସୀ କ୍ଷୋଭର ସହ ପ୍ରକାଶ କରିଛନ୍ତି।