ନୂଆପଡ଼ା:ଖଡିଆଳ ବ୍ଲକ ଚଚରାଭଟା ଗାଁରେ ଅପହରଣ ହୋଇଥିବା ଯୁବତୀଙ୍କ ପିତାମାତା ଓ ଜୟ କିଷାନ ମଜଦୂର ସଂଗ୍ରାମ ପରିଷଦ ଥାନା ଘେରାଉ କରିଛନ୍ତି । ଅପହୃତା ଯୁବତୀଙ୍କୁ ତୁରନ୍ତ ଉଦ୍ଧାର କରିବା ସହିତ ଅଭିଯୁକ୍ତମାନଙ୍କୁ ଗିରଫ କରିବା ଦାବି କରିଛନ୍ତି । ତୁରନ୍ତ କୌଣସି କାର୍ଯାନୁଷ୍ଠାନ ନିଆନଗଲେ ଖଡିଆଳ ଥାନା ସମ୍ମୁଖରେ ସେମାନେ ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି ।
ଅପହୃତା ଯୁବତୀଙ୍କୁ ଉଦ୍ଧାର ଦାବିରେ ଖଡିଆଳ ଥାନା ଘେରାଉ ଅପହୃତ ନିଖୋଜ ଯୁବତୀଙ୍କୁ ଖୋଜି ବାହାର କରିବା ଦିଗରେ ଖଡ଼ିଆଳ ପୋଲିସ ଆଖି ଦୃଷ୍ଟିଆ ପଦକ୍ଷେପ ଗ୍ରହଣ କରୁନଥିବା ନିଖୋଜ ଯୁବତୀଙ୍କ ବାପା ମାଆ ଅଭିଯୋଗ କରିଛନ୍ତି। ଅଭିଯୁକ୍ତମାନଙ୍କ କଲ ରେକଡ଼ିଂ ଏବଂ ଅନ୍ୟାନ୍ୟ ପ୍ରମାଣ ପତ୍ର ପୋଲିସକୁ ଦେବା ପରେ ମଧ୍ୟ ପୋଲିସର ନୀରବତା ଯୁବତୀଙ୍କ ବାପା ମାଆଙ୍କୁ ହତାଶ କରିଛି। ଫଳରେ ଅଭିଯୁକ୍ତମାନେ ଖସି ଯାଉଥିବା ସେମାନେ ଅଭିଯୋଗ କରିଛନ୍ତି ।
ସୂଚନା ଥାଉ କି ଗ୍ରାମର ଧନୁଯ୍ୟ ଟାହାଣୀଙ୍କ 20 ବର୍ଷୀୟା ଝିଅ ଗତ ଫେବୃଆରୀ ମାସ 24 ତାରିଖରେ ଅପହରଣ ହୋଇଥିଲେ । ସେ ନିକଟସ୍ଥ ପୋଖରୀକୁ ଗାଧୋଇବାକୁ ଯାଇଥିବାବେଳେ ଆର୍ତ୍ତତ୍ରାଣପୁର ଗ୍ରାମର ବ୍ରଜହଂସ ନାମକ ଯୁବକ ତାର 3 ସହଯୋଗୀଙ୍କ ସହୟତାରେ ଯୁବତୀଙ୍କୁ ଅପହରଣ କରିଥିଲା । ଖୋଜାଖୋଜି କରିବା ପରେ ମଧ୍ୟ କେହି ଯୁବତୀର କୌଣସି ପତ୍ତା ପାଇନଥିଲେ । ଫଳରେ 26 ତାରିଖରେ ଖଡ଼ିଆଳ ଥାନାରେ ଯୁବତୀର ବାପା ଲିଖିତ ଅଭିଯୋଗ କରିଥିଲେ । ସେହିଦିନ ଠାରୁ ଦୀର୍ଘ 3 ମାସ ବିତିଯାଇଥିଲେ ସୁଦ୍ଧା ଯୁବତୀକୁ ଖୋଜି ବାହାର କରିବାରେ ଖଡ଼ିଆଳ ପୋଲିସ ସଫଳ ପାଇନାହିଁ।
ଅପରପକ୍ଷେ ଯୁବତୀ ଅପହରଣକାରୀକୁ ଗିରଫ କରିବାରେ ମଧ୍ୟ ଖଡ଼ିଆଳ ପୋଲିସର ହାତ ଖାଲି ପଡ଼ିଛି। ପୋଲିସର ବିଫଳତାକୁ ନିନ୍ଦା କରି ଶୁକ୍ରବାର ଜୟ କିଷାନ ମଜଦୂର ସଂଗ୍ରାମ ପରିଷଦ ଆବାହକ ଯଦୁମଣି ପାଣିଗ୍ରାହୀ, କିଷାନ ଶ୍ରମିକ ନେତା କେଶବ ବେହେରାଙ୍କ ନେତୃତ୍ବରେ କୋଭିଡ ଗାଇଡ଼ ଲାଇନ୍ସକୁ ପାଳନ କରି ଖଡ଼ିଆଳ ଥାନା ଘେରାଉ କରିଛନ୍ତି। ଘଟଣା ସମ୍ପର୍କରେ ଖଡ଼ିଆଳ SDPO ସନ୍ତକ ଜେନାଙ୍କୁ ପଚାରିବାରୁ ମାମଲା ରୁଜୁ ହୋଇ ତଦନ୍ତ ଚାଲିଛି । ଖୁବଶୀଘ୍ର ଅଭିଯୁକ୍ତ ଗିରଫ ହେବ ବୋଲି ସେ ପ୍ରତିଶ୍ରୁତି ଦେଇଛନ୍ତି।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
