ନୂଆପଡା: ନୂଆଖାଇ ବା ନବାନ୍ନ ଭକ୍ଷଣର ଶୁଭ ଲଗ୍ନ ଧାର୍ଯ୍ୟ ହୋଇଯାଇଛି । ଯୁବରାଜ ଦେବଦେବ ସିଂ ଦେଓଙ୍କ ଅଧ୍ୟକ୍ଷତାରେ ଚଳିତ ବର୍ଷର ଶୁଭ ଲଗ୍ନ ଧାର୍ଯ୍ୟ ହୋଇଛି । ସଂସ୍କୃତି ସମ୍ପନ୍ନ ଐତିହାସିକ ଖଡ଼ିଆଳ ସହର ରାଜ ଦରବାରଠାରେ ଯୁବରାଜ ଦେବଦେବ ସିଂ ଦେଓଙ୍କ ଉପସ୍ଥିତିରେ ଲଗ୍ନ ଧାର୍ଯ୍ୟ କରାଯାଇଛି। ଚଳିତ ବର୍ଷ ସେପ୍ଟେମ୍ବର ମାସ 19 ତାରିଖ ରାତ୍ରିରେ ଇଷ୍ଟ୍ରଦେବୀ ମା' ସମଲେଶ୍ବରୀ ଏବଂ ଗଡରକ୍ଷକ ମା' ରକ୍ତାମ୍ବରୀଙ୍କ ଠାରେ ନବାନ୍ନ ଲାଗିହେବ । ପରେ 20 ତାରିଖ ଭାଦ୍ରବ ମାସ ଶୁକ୍ଳପକ୍ଷ ପଞ୍ଚମୀ ତିଥି ସକାଳ 10ଟା 27 ମିନିଟରୁ 11ଟା 40 ମିନିଟ ମଧ୍ୟରେ ସର୍ବସାଧାରଣ ନବାନ୍ନ ଭକ୍ଷଣ କରିପାରିବେ। ଏହି ନିର୍ଦ୍ଧାରିତ ଲଗ୍ନ ଅନୁଯାୟୀ ନୂଆଖାଇ ପାଳନ କରିବା ପାଇଁ ଯୁବରାଜ ଦେବଦେବ ସିଂ ଦେଓ ଜିଲ୍ଲାବାସୀଙ୍କୁ ସୂଚନା ଦେଇଛନ୍ତି ।
2023ର ନୂଆଖାଇ ଲଗ୍ନ ଧାର୍ଯ୍ୟ ସରିଛି। ଯୁବରାଜ ଦେବଦେବ ସିଂ ଦେଓଙ୍କ ଅଧ୍ୟକ୍ଷତାରେ ପଶ୍ଚିମ ଓଡିଶାର ଗଣପର୍ବ ନୂଆଖାଇ ବା ନବାନ୍ନ ଭକ୍ଷଣର ଶୁଭ ଲଗ୍ନ ଧାର୍ଯ୍ୟ କରାଯାଇଥିବାବେଳେ ନୂଆପଡା ଜିଲ୍ଲାବାସୀଙ୍କ ମଧ୍ୟରେ ଉତ୍କଣ୍ଠା ଦେଖିବାକୁ ମିଳିଛି । ନୂଆଖାଇ ଲଗ୍ନ ଧାର୍ଯ୍ୟ ପରମ୍ପରା ଦେଶ ସ୍ବାଧୀନତା ପୂର୍ବରୁ ଚାଲି ଆସୁଛି। ରାଜାରାଜୁଡା ଶାସନ କାଳରୁ ରାଜାଙ୍କ ଉପସ୍ଥିତିରେ ଲଗ୍ନ ଧାର୍ଯ୍ୟ କରାଯିବାର ନିୟମ ଚାଲି ଆସିଛି ।