ନୂଆପଡା: ନୂଆପଡା ଜିଲ୍ଲାରେ ଆରମ୍ଭ ହେବ ଖରିଫ ଧାନ କିଣା ପ୍ରକ୍ରିୟା । ଏଥିପାଇଁ ଆଜି ଜିଲ୍ଲା ପ୍ରଶାସନ ତରଫରୁ 2023-24 ଖରିଫ ବର୍ଷ ପାଇଁ ଜିଲ୍ଲାସ୍ତରୀୟ ଧାନ କ୍ରୟ କମିଟି ବୈଠକ ଅନୁଷ୍ଠିତ ହୋଇଯାଇଛି । ଚଳିତ ବର୍ଷ ନଭେମ୍ବର ମାସ 24 ତାରିଖଠାରୁ ଜିଲ୍ଲାରେ ଧାନ ମଣ୍ଡି ଶୁଭାରମ୍ଭ ହେବ ବୋଲି ସୂଚନା ମିଳିଛି । ଧାନ ବିକ୍ରୟ କରିବା ପାଇଁ 44 ହଜାର ଚାଷୀ ପଞ୍ଜିକୃତ କରିଛନ୍ତି । ଏହି ବୈଠକରେ ବିଭିନ୍ନ ବିଷୟରେ ଆଲୋଚନା କରାଯାଇଥିବା ବେଳେ ଅସାଧୁ ବ୍ୟବସାୟୀଙ୍କ ଉପରେ ନଜର ରଖିବା ପାଇଁ ସ୍ୱତନ୍ତ୍ର କମିଟି ଗଠନ କରାଯାଇଛି ।
ସୂଚନା ଯୋଗ୍ୟ ଆଜି ଜିଲ୍ଲା ସଦ୍ଭାବନା ଗୃହଠାରେ ପ୍ରଶାସନ ତରଫରୁ 2023-24 ଖରିଫ ବର୍ଷ ପାଇଁ ଜିଲ୍ଲାସ୍ତରୀୟ ଧାନ କ୍ରୟ କମିଟି ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ହେମକାନ୍ତ ସାଏଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିଲା । ଚଳିତ ବର୍ଷ ନଭେମ୍ବର ମାସ 24 ତାରିଖଠାରୁ ନୂଆପଡା ଜିଲ୍ଲାରେ ଧାନ ମଣ୍ଡି ଶୁଭାରମ୍ଭ ହେବ ବୋଲି ଜିଲ୍ଲାପାଳ ହେମକାନ୍ତ ସାଏ ସୂଚନା ଦେଇଛନ୍ତି ।
ସେହିଭଳି ଚଳିତବର୍ଷ ଧାନ ବିକ୍ରୟ କରିବା ପାଇଁ 44 ହଜାର ଚାଷୀ ପଞ୍ଜିକୃତ ହୋଇଥିବା ବେଳେ,ସରକାରଙ୍କ ପକ୍ଷରୁ ପ୍ରଥମ ପର୍ଯ୍ୟାୟରେ 17 ଲକ୍ଷ 92 ହଜାର କୁଇଣ୍ଟାଲ ଧାନ କ୍ରୟ କରିବା ପାଇଁ ଟାର୍ଗେଟ ରଖାଯାଇଛି । ଜିଲ୍ଲାରେ 76 ଗୋଟି ଧାନ ମଣ୍ଡିରେ ଧାନ କିଣା ବିକା ହେବାକୁ ଥିବାବେଳେ, 26 ଗୋଟି ପେକ୍ସ ଏବଂ 13 ଗୋଟି ମହିଳା ସ୍ବୟଂ ସହାୟକ ଗୋଷ୍ଠୀ ଧାନ କ୍ରୟ କରିବେ ବୋଲି ବୈଠକରେ ଜଣାପଡ଼ିଛି । ବେଆଇନ ଧାନ ବିକ୍ରୟ ଏବଂ ଅସାଧୁ ମିଡିଲମ୍ୟାନମାନଙ୍କୁ ଦୃଷ୍ଟି ଦେବାପାଇଁ ସ୍ୱତନ୍ତ୍ର କମିଟି ଗଠନ କରାଯାଇଛି । ଅନ୍ୟପଟେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଏହି ବୈଠକ ଆୟୋଜନ କରାଯାଇଥିବା ବେଳେ ବାସ୍ତବରେ କୌଣସି ନିଷ୍ପତି କାର୍ଯ୍ୟକାରୀ ହେଉନଥିବା ଅଭିଯୋଗ କରିଛନ୍ତି ଚାଷୀ ପ୍ରତିନିଧି ଯଦୁମଣି ପାଣିଗ୍ରାହୀ ।