ନୂଆପଡା: ଦଳିତ ଅଧିକାର ମଞ୍ଚ ପାଇଁ ଶ୍ରମିକ ଫେରିପାଇଲେ ପ୍ରାପ୍ୟ । କାମ କରି ପ୍ରାପ୍ୟ ପାଇ ନ ଥିବା ଶ୍ରମିକଙ୍କୁ ନେଇ ଦଳିତ ଅଧିକାର ମଞ୍ଚ ସଭାପତି କମଳ ଚରଣ ତାଣ୍ଡିଙ୍କ ଖଡିଆଳ ବନବିଭାଗ କାର୍ଯ୍ୟାଳୟରେ ଫେରାଦ ହୋଇଥିଲେ । ଏଥିରେ 30ରୁ ଉର୍ଦ୍ଧ୍ବ ଶ୍ରମିକ ସାମିଲ ହୋଇଥିଲେ ।
ସୂଚନା ଅନୁସାରେ ଖଡ଼ିଆଳ ବ୍ଲକ ରାଣୀମୁଣ୍ଡା ଗାଁର 30ରୁ ଊର୍ଦ୍ଧ୍ବ କର୍ମଚାରୀ ବନବିଭାଗ ଅଧୀନରେ 2016 ମସିହାରେ ଗାତ ଖନନ ଓ ଚାରାରୋପଣ କାର୍ଯ୍ୟ କରିଥିଲେ । ଦୀର୍ଘ 4 ବର୍ଷ ବିତି ଯାଇଥିଲେ ମଧ୍ୟ ବନ କର୍ମଚାରୀ ଶ୍ରମିକଙ୍କୁ ମିଛ ପ୍ରତିଶ୍ରୁତି ଦେଇ ଠକି ଚାଲିଥିବା ଅଭିଯୋଗ ହୋଇଥିଲା । ଏସମ୍ପର୍କରେ ଖବର ପାଇବା ପରେ ଦଳିତ ଅଧିକାର ମଞ୍ଚ ସଭାପତି କମଳ ଚରଣ ତାଣ୍ଡି ଶ୍ରମିକଙ୍କୁ ମଜୁରୀ ଟଙ୍କା ପ୍ରଦାନ ଦାବିରେ ଖଡ଼ିଆଳ ବନବିଭାଗ ରେଞ୍ଜର ସଡାନନ୍ଦ ସୁନାନୀଙ୍କୁ ଜଣାଇଥିଲେ । ଏହାପରେ ରେଞ୍ଜର ସଡାନନ୍ଦ ସୁନାନୀ ତୁରନ୍ତ ତଦନ୍ତ କରି 4ବର୍ଷ ଅପେକ୍ଷା କରିଥିବା ଶ୍ରମିକ ମାନଙ୍କୁ ମଜୁରୀ ଟଙ୍କା ପ୍ରଦାନ କରିଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
