ଗାଁର ମଦ୍ୟପଙ୍କୁ ସାବାଡ କରିବାକୁ ମଦ ମୁକ୍ତି ଆନ୍ଦୋଳନରେ ଶତାଧିକ ମହିଳା

ସ୍ଥାନୀୟ ଖଡିଆଳ ଥାନା ଅନ୍ତର୍ଗତ ଭୋଜପୁର ଗାଁରେ ତେଜିଲା ମଦ ମୁକ୍ତି ଆନ୍ଦୋଳନ । ଆନ୍ଦୋଳନରେ ସାମିଲ ହେଲେ ମହିଳା ସ୍ବୟଂ ସହାୟକ ଗୋଷ୍ଠୀର ଶତାଧିକ ମହିଳା । ହାତରେ ଠେଙ୍ଗା ଧରି ଗାଁ ପରିକ୍ରମା କଲେ ମହିଳା ।

ନୂଆପଡା: ସ୍ଥାନୀୟ ଖଡିଆଳ ଥାନା ଅନ୍ତର୍ଗତ ଭୋଜପୁର ଗାଁରେ ତେଜିଲା ମଦ ମୁକ୍ତି ଆନ୍ଦୋଳନ । ଆନ୍ଦୋଳନରେ ସାମିଲ ହେଲେ ମହିଳା ସ୍ବୟଂ ସହାୟକ ଗୋଷ୍ଠୀର ଶତାଧିକ ମହିଳା । ହାତରେ ଠେଙ୍ଗା ଧରି ଗାଁ ପରିକ୍ରମା କଲେ ମହିଳା । ପରେ ଭୋଜପୁର ଭୁଲିଆସିକୁଆ ଗାଁ ମଝିରେ ଥିବା ଭୋଜପୁର ଦେଶୀ ମଦଭାଟିକୁ ଘେରାଉ କରି ଏହାକୁ ନଷ୍ଟ କରିଛନ୍ତି ଉତ୍ତ୍ୟକ୍ତ ଆନ୍ଦୋଳନକାରୀ ମହିଳାମାନେ ।

ସୂଚନା ଅନୁଯାୟୀ ଗାଁରେ ଥିବା ମଦ କୋଠୀମାନଙ୍କୁ ବେଆଇନ ଭାବରେ ମଦ ନଦେବାକୁ ମଦଭାଟି ମ୍ୟାନେଜରଙ୍କୁ ତାଗିଦ କରିଥିଲେ ଆନ୍ଦୋଳନକାରୀ ମହିଳାମାନେ । କେବଳ ସେତିକି ନୁହେଁ ମଦଭାଟି ନିକଟରେ ଥିବା 2 ଗୋଟି ବେଆଇନ ମଦ କୋଠୀକୁ ନିଆଁ ଲଗାଇବା ସହ ବ୍ୟାପକ ମଦ ପାଉଚ ମଧ୍ୟ ନଷ୍ଟ କରିଛନ୍ତି ଆନ୍ଦୋଳନକାରୀ । ସେପଟେ ଭୋଜପୁର ଗାଁରେ ଦିନକୁ ଦିନ ବେଆଇନ ମଦ କାରବାର ବଢ଼ିବାରେ ଲାଗିଥିବାରୁ ସନ୍ଧ୍ୟା ସମୟରେ ଗାଁର ମଦୁଆମାନେ ନିଶାସକ୍ତ ଅବସ୍ଥାରେ ଗାଁ ଦାଣ୍ଡରେ ଉତ୍ପାତ କରୁଥିବା ମହିଳାମାନେ ଅଭିଯୋଗ କରିଛନ୍ତି ।

ମଦୁଆଙ୍କ କୁପ୍ରଭାବତ ଯୋଗୁଁ ଛାତ୍ରଛାତ୍ରୀ, ଯୁବକ ଓ ଯୁବତୀମାନଙ୍କରେ ଘରୁ ବାହାରିବାରେ ଅସୁବିଧା ହେଉଥିବା ଦେଖାଯାଉଛି । ସେପଟେ ଅନେକ ମଦ୍ୟପ ମଦ ପିଇବା ପରେ ଘରେ ଥିବା ସ୍ତ୍ରୀ ଓ ପିଲା ଛୁଆଙ୍କୁ ମାର ପିଟ କରୁଥିବା ମଧ୍ୟ ଅଭିଯୋଗ ଆସିଥିଲା । ଯାହାର ପ୍ରତିବାଦରେ ମଦୁଆଙ୍କୁ ସାବାଡ କରିବା ସହ ଗାଁରେ ଥିବା ମଦ କୋଠୀକୁ ବନ୍ଦ କରିବା ପାଇଁ ଅଣ୍ଟା ଭିଡିଛନ୍ତି ଗାଁର ମହିଳାମାନେ ।

ନୂଆପଡାରୁ ମୋତିଲାଲ ବାଗ, ଇଟିଭି ଭାରତ