ନୂଆପଡା: ସ୍ଥାନୀୟ ବରଗାଁ ଗ୍ରାମ ପଞ୍ଚାୟତସ୍ଥିତ ନଈ କୂଳିଆ ବୋଟୋପାଲି ଗାଁ ଲୋକଙ୍କୁ ଦାଉ ସାଜିଲା ଲଘୁଚାପଜନିତ ଲଗାଣ ବର୍ଷା । ଚାଳ ଛପର ବାସଗୃହଗୁଡ଼ିକ ଧସି ଭୁଷୁଡି ଭାଙ୍ଗି ଯାଇଥିବା ବେଳେ ବାସ ଗୃହ ହରାଇ ଦୁର୍ବିସହରେ ଜୀବନ ବଞ୍ଚାଇଛନ୍ତି ଗାଁର 10ରୁ ଉର୍ଦ୍ଧ୍ବ ପରିବାର । ଗରିବ ଅସହାୟ ହୋଇଥିବାରୁ ନୂତନ ବାସଗୃହ ନିର୍ମାଣ କରିବାରେ ସକ୍ଷମ ନୁହନ୍ତି କ୍ଷତିଗ୍ରସ୍ତ ଲୋକେ । ଏବେ କେବଳ ସରକାରୀ ଆବାସ ଗୃହକୁ ଅପେକ୍ଷା ।
ଭିଟାମାଟି ଧୋଇଲା ବର୍ଷା ପାଣି, ନିଦ ହଜାଇଛି ପ୍ରଶାସନର ନାସ୍ତି ବାଣୀ ନୂଆପଡା ଜିଲ୍ଲା ସଦର ମହୁକମାଠାରୁ 95 କିଲୋମିଟର ଦୂରତାରେ ଅବସ୍ଥିତ ବରଗାଁ ଗ୍ରାମପଞ୍ଚାୟତସ୍ଥିତ ନଈ କୂଳିଆ ବୋଟୋପାଲି ଗାଁ । ବୋଟୋପାଲି ଗାଁ ମୁହଁ ଦେଇ ବହିଯାଇଛି ଅହିଲାଟ ନଈ ଏବଂ ଗାଁ ପଛପଟ ଦେଇ ବହିଯାଇଛି ସାହାଯୋର ନଈ । ଦୁଇ ନଈ ଦ୍ବାରା କବଳିତ ବୋଟୋପାଲି ଗାଁ । ଉପର ମୁହାଣରେ ସ୍ବଳ୍ପ ବର୍ଷା ହେଲେ ମଧ୍ୟ ଏଠିକାର ଲୋକେ ବନ୍ୟା ବିତ୍ପାତରେ କ୍ଷତିଗ୍ରସ୍ତ ହୋଇଥାନ୍ତି । ଏମିତିରେ ଚଳିତ ଲଘୁଚାପ ଜନିତ ଲଗାଣ ବର୍ଷା ଗାଁ ଲୋକଙ୍କ ଘର ଦ୍ବାର ଉଜାଡ଼ି ଦେଇଛି । ଗାଁର ଭାଗତ ସାତନାମୀ, ମଙ୍ଗଲରାମ ସାତନାମୀ, ପୀତବାସ ସାତନାମୀ, ସୁନୀଲ ସାତନାମୀ ଏବଂ ଅମରସିଂ ସାତନାମୀ ଭଳି 10ରୁ ଉର୍ଦ୍ଧ୍ବ ପରିବାରର ବାସଗୃହ ଧସି ଭୁଷୁଡି ଭାଙ୍ଗି ପଡିଛି ।
950 ଜନସଂଖ୍ୟା ବିଶିଷ୍ଟ ବୋଟୋପାଲି ଗାଁକୁ ଦାଉ ସାଜିଲା ଅହିଲାଟନଦୀ ଏବଂ ସାହାଯୋର ନଦୀ । ଫଳରେ କିଛି ପରିବାର ଅର୍ଦ୍ଧ ଭଗ୍ନ ବାସଗୃହରେ ଆଶ୍ରୟ ନେଇଥିବା ବେଳେ ଆଉ କିଛି ଲୋକ ବେସାହାରା ହୋଇ ଖୋଲା ଆକାଶ ତଳେ ପଲିଥିନ ଲଗାଇ ଦୁର୍ବିସହ ଭାବେ ଆଶ୍ରୟ ନେଇଛନ୍ତି । ପ୍ରତିବର୍ଷ ଏହି ଗାଁର ଲୋକମାନେ ବନ୍ୟା କ୍ଷତିରେ ପଡ଼ିଥାନ୍ତି । ସହାୟତା ପାଇଁ ସ୍ଥାନୀୟ ସରପଞ୍ଚ, ସିନାପାଲି ବିଡିଓ, ନୂଆପଡା ଜିଲ୍ଲାପାଳଙ୍କ ଦ୍ବାରସ୍ଥ ହୋଇ ଦୁଃଖ ଜଣାଇଥାନ୍ତି ସତ ହେଲେ ଫଳାଫଳ ଶୂନ୍ୟ । ଏବେ ପୁଣି ସେହି ଦୁଃଖ ଚଳିତ ଲଘୁଚାପ ଜନିତ ଲଗାଣ ବର୍ଷାରେ ବେହାଲ ଗାଁ ଲୋକେ ।
10ରୁ ଉର୍ଦ୍ଧ ପରିବାର ଲୋକଙ୍କ ବାସଗୃହ ଧସି ଭୁଷୁଡି ଯାଇଛି ତ ଆଉ କାହାର ଘର ଫାଟି ଆଁ କରିଛି । ବାସହରା ଲୋକଙ୍କୁ ବାସଗୃହ ଯୋଗାଇ ଦେବାକୁ ଆମେ ସିନାପାଲି ବିଡିଓଙ୍କ ସହ ଆଲୋଚନା କରିଥିଲୁ । ଅପରପକ୍ଷେ ଚଳିତ 2019-20 ଆର୍ଥିକ ବର୍ଷରେ 734 ପ୍ରଧାନମନ୍ତ୍ରୀ ଆବାସ ଗୃହ ଏବଂ 2020-21 ଆର୍ଥିକ ବର୍ଷରେ 2692 ଆବାସ ଗୃହ ମଞ୍ଜୁର କରିଛନ୍ତି ସରକାର । ଆଗାମୀ ଦିନରେ ପର୍ଯ୍ୟାୟକ୍ରମେ ବୋଟୋପାଲି ଗାଁ ଲୋକଙ୍କୁ ବାସଗୃହ ଯୋଗାଇ ଦେବେ ବୋଲି ସିନାପାଲି ବିଡିଓ ପ୍ରତିଶ୍ରୁତି ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
