ନୂଆପଡା: ଜିଲ୍ଲାରେ ରବିବାର ଦ୍ବିପ୍ରହର ସମୟରେ ହଠାତ ଆସି ପହଞ୍ଚିଲା ଘୁର୍ଣ୍ଣିଝଡ । ଏଥିରେ ଖଡ଼ିଆଳ ବ୍ଲକ ଗୋଡ଼ତଲା ଗାଁର ଦିବ୍ୟାଙ୍ଗ ରୋହିତ ମଲ୍ଲିକଙ୍କ ବାସଗୃହକୁ ଛାରଖାର କରିଦେଇଛି । ଦିବ୍ୟାଙ୍ଗ ରୋହିତ ମଲ୍ଲିକ ସ୍ତ୍ରୀ ରାଏବତୀ ମଲ୍ଲିକ ୨ ନାବାଳିକା ଚନ୍ଦ୍ରମୁଖୀ, ଗୁଞ୍ଜନକୁ ନେଇ ଦୁଃଖକଷ୍ଟରେ ତେଲଲୁଣର ସଂସାର କରି ନିଜ ଗାଁ ଗୋଡ଼ତଲାରେ ଚରୁଥିଲେ ।
ପରିବାର ପ୍ରତିପୋଷଣ ପାଇଁ ରୋହିତ ଦାଦନ ଖଟିବାକୁ ବହୁଦିନ ପୂର୍ବେ ଯାଇଥିଲେ । ସେହି ସମୟରେ ଏକ ଦୁର୍ଘଟଣାର ଶିକାର ହୋଇ ରୋହିତ ୨ ଗୋଡ ହରାଇ ଦିବ୍ୟାଙ୍ଗ ପାଲଟିଯାଇଛନ୍ତି । ଚାଳଛପର ଆଡ଼ବେଷ୍ଟର ଘର କରି ନିଜଗାଁ ଗୋଡ଼ତଲାରେ ଆଶ୍ରୟ ନେଇଥିଲେ ଏହି ପରିବାର । ରବିବାର ପ୍ରବଳ ଘୁର୍ଣ୍ଣିଝଡ ହେବାରୁ ରୋହିତଙ୍କ ବାସଗୃହ ସମ୍ପୂର୍ଣ୍ଣ ଛାରଖାର ହୋଇଯାଇଛି । ଏବେ ଏହି ଅସହାୟ ପରିବାରଙ୍କୁ ସରକାରୀ ସହାୟତା ସହ ବାସଗୃହ ଯୋଗାଇଦେବା ପାଇଁ ଗାଁ ଲୋକେ ଦାବି କରିଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
