ନୟାଗଡ: ଉପାନ୍ତ ଅଞ୍ଚଳରେ ଲୋକଙ୍କୁ ହଇରାଣ କରୁଛନ୍ତି ଠିକାଦାର । ଗୋଟିଏ ପୋଲ ନିର୍ମାଣ କାର୍ଯ୍ୟକୁ 5 ବର୍ଷ ବିତି ଯାଇଥିଲେ ମଧ୍ୟ ପୋଲ କାର୍ଯ୍ୟ ସମ୍ପୂର୍ଣ୍ଣ ହୋଇପାରିନାହିଁ । ଶେଷରେ ଗ୍ରାମବାସୀ ଏକାଠି ହୋଇ ନିଜସ୍ବ ଉଦ୍ୟମରେ ପୋଲ ନିର୍ମାଣ କରିଛନ୍ତି ।
ମନମାନି କଲେ ଠିକାଦାର, ଗ୍ରାମବାସୀଙ୍କ ଉଦ୍ୟମରେ କାଠ ପୋଲ ନିର୍ମାଣ
ଏପରି ଏକ ଉଦାହରଣ ସୃଷ୍ଟିକାରୀ ଘଟଣା ଦେଖିବାକୁ ମିଳିଛି ନୟାଗଡ ଜିଲ୍ଲା ରଣପୁର ବ୍ଲକ ଉପାନ୍ତ ଅଞ୍ଚଳ ରାଆଁଳ ଗ୍ରାମରେ । ଠିକାଦାରଙ୍କ ଅବହେଳା କାରଣରୁ ଦୀର୍ଘଦିନ ଧରି ଅଧପନ୍ତରିଆ ହୋଇ ପଡି ରହିଥିଲା ପୋଲ ନିର୍ମାଣ କାର୍ଯ୍ୟ । ଏନେଇ ସ୍ଥାନୀୟ ଲୋକେ ଅଭିଯୋଗ କରିବା ପରେ କେହି ନଶୁଣିବାରୁ ଶେଷରେ ଗ୍ରାମବାସୀ ବାଧ୍ୟ ହୋଇ ନିଜସ୍ୱ ଟଙ୍କା ଆଦାୟ କରି କାଠ ପୋଲ ନିର୍ମାଣ କରିଛନ୍ତି । ସରକାରଙ୍କ ମାଳମାଳ ଯୋଜନା ଭିତରେ ହଜିଯାଇଛି ଏହି ଅଧ୍ୟୁଷିତ ଆଦିବାସୀ ଗାଁର ବିକାଶ । ବର୍ଷା ହେଲେ ଏହି ଗାଁଟି ବାହ୍ୟଜଗତରୁ ବିଛିନ୍ନ ହେଉଥୁବାରୁ ଗମନାଗମନରେ ଅସୁବିଧା ସମ୍ମୁଖୀନ ହୁଅନ୍ତି ଲୋକେ ।