ନୟାଗଡ଼:ନିଖୋଜ 3 ବର୍ଷର ଶିଶୁ ସ୍ବାତୀର ମୃତଦେହ ଗାଁ ନିକଟସ୍ଥ ପୋଖରୀରୁ ମଙ୍ଗଳବାରୁ ମିଳିବା ପରେ ଗୁରୁବାର ସ୍ବାତୀକୁ ଗାଁରେ ସମାଧି ଦିଆଯାଇଛି । ଶୋକାକୁଳ ପରିବେଶ ମଧ୍ୟରେ ବଧିପାଟଣା ଗ୍ରାମର ଏକ ପୋତା ପୋଖରୀର ପୋଲିସର ଉପସ୍ଥିତିରେ ସ୍ବାତୀକୁ ସମାଧି ଦିଆଯାଇଛି ।
ଜିଲ୍ଲାର ରଣପୁର ଥାନା ଅଧିନ ବଧିପାଟଣା ଗ୍ରାମରେ ଗୁରୁବାର ଶୋକାକୁଳ ପରିସ୍ଥିତି ସୃଷ୍ଟି ହୋଇଛି । ଚର୍ଚ୍ଚିତ ସ୍ଵାତୀ ଘଟଣାରେ ପ୍ରଥମେ ନିଖୋଜ ଏବଂ 5 ଦିନ ପରେ ଗାଁ ପୋଖରୀରୁ ମୃତଦେହ ମିଳିବା ଘଟଣା ସାରା ଓଡିଶାରେ ଚର୍ଚ୍ଚାର ବିଷୟ ପାଲଟିଥିଲା । ସ୍ବାତୀକୁ ଅପହରଣ ପରେ ହତ୍ୟା କରି କେହି ପୋଖରୀରେ ପକେଇଦେଇଥିବା ପରିବାର ବର୍ଗ ଅଭିଯୋଗ କରିଛନ୍ତି । ମୃତଦେହ ମିଳିବା ପରେ ପୋଲିସ ସାଇଣ୍ଟିଫିକ ଟିମ ଏବଂ ସନ୍ଧାନୀ କୁକୁର ସାହାଯ୍ୟରେ ତଦନ୍ତକୁ ଜୋରଦାର କରିବା ସହ ଘଟଣାର ସତ୍ୟାସତ୍ୟ ଉପରେ ଖୋଳ ତାଡ଼ ଜାରି ରଖିଛି ।