ନୟାଗଡ଼: ହଲ୍ ନମିଳିବାରୁ ସରକାରୀ କଲ୍ୟାଣ ମଣ୍ଡପରେ ରିଲିଜ ହେଲା ଓଡ଼ିଆ ସିନେମା । ରବିବାର ନୟାଗଡ଼ ଜିଲ୍ଲା ଓଡ଼ଗାଁ ସରକାରୀ କଲ୍ୟାଣ ମଣ୍ଡପ ପରିସରରେ ପ୍ରଥମଥର ପାଇଁ କେ.ମୂରଲୀକୄଷ୍ଣା ନିର୍ଦ୍ଦେଶିତ ଓଡ଼ିଆ ଚଳଚ୍ଚିତ୍ର 'ପ୍ରେମରେ ରିସ୍କ ହେଲା ମୋତେ ଇସ୍କ' ର ଶୁଭମୁକ୍ତି ହୋଇଯାଇଛି । ଆଗାମୀ 6 ଦିନ ପର୍ଯ୍ୟନ୍ତ ଏହି ଫିଲ୍ମ ଚାଲିବା ନେଇ ସୂଚନା ମିଳିଛି ।
ଓଡ଼ଗାଁ ବ୍ଲକର ସଞ୍ଜୟ କୁମାର ପାତ୍ର ଓ ଉମେଶ ସାହୁ ଏହି ଚଳଚ୍ଚିତ୍ରର ପ୍ରଯୋଜକ ଥିବାବେଳେ ସଞ୍ଜୟ ସଙ୍ଗୀତ ନିର୍ଦ୍ଦେଶକ ମଧ୍ୟ ଅଛନ୍ତି । ସିତୁ, ସୂର୍ଯ୍ୟନ୍ ରଥ, ନରେନ୍ଦ୍ର ଗୌଡ଼ ସିନେମାଟୋଗ୍ରାଫର କରିଛନ୍ତି । ମୁଖ୍ୟ ଅଭିନୟରେ ଅଛନ୍ତି ଶୈଳେନ୍ଦ୍ର ଓ ଦିବ୍ୟା । ଖଳନାୟକ ଭୂମିକାରେ ଅଭିନେତା ଚିନ୍ତାମଣି ବିଶ୍ୱାଳ, ଚୌଧୁରୀ ଜୟପ୍ରକାଶ ଦାସ, ରତନ ମେହର, ଶୁଭ୍ରାଂଶୁ, ମୁନା, କାଳିଆ ଷଣ୍ଢ ନଜର ଆସିଛନ୍ତି । ପାର୍ଶ୍ଵ ଅଭିନେତ୍ରୀ ଅନୁପା, ଅଞ୍ଜନା ମିଶ୍ର, ଦୀପ୍ତି, ରାଜଲକ୍ଷ୍ମୀ,ଦେବ୍ ଏବଂ ଶିଶୁ କଳାକାର ଆଲିଆ, ତାପସ, ଆୟୁଷଙ୍କ ଅଭିନୟ ଦର୍ଶକଙ୍କ ମନ ମୋହିଥିଲା । ସ୍ଥାନୀୟ ଶ୍ରୀ ରଘୁନାଥଙ୍କ ମନ୍ଦିରଠାରୁ ଏକ ବିଶାଳ ଶୋଭାଯାତ୍ରାରେ ଚଳଚ୍ଚିତ୍ରର କଳାକାରମାନଙ୍କୁ କଲ୍ୟାଣ ମଣ୍ଡପ ପର୍ଯ୍ୟନ୍ତ ଅଣାଯାଇ ଶତାଧିକ ଦର୍ଶକଙ୍କ ଗହଣରେ ଚଳଚ୍ଚିତ୍ରଟିର ଶୁଭମୁକ୍ତି କରାଯାଇଥିଲା । କଲ୍ୟାଣ ମଣ୍ଡପ ବାହାରେ ଟିକେଟ୍ ବିକ୍ରି କରାଯାଇଥିଲା ।