ନୟାଗଡ ନାବାଳିକା ହତ୍ୟା ମାମଲା: ଆଜି ସରିବ ଅଭିଯୁକ୍ତର ରିମାଣ୍ଡ ଅବଧି

ବହୁ ଚର୍ଚ୍ଚିତ ନୟାଗଡ ନାବାଳିକା ହତ୍ୟା ମାମଲାରେ ଗିରଫ ଅଭିଯୁକ୍ତର ଆଜି ସରିବ ରିମାଣ୍ଡ ଅବଧି । ଅଧିକ ପଢନ୍ତୁ...

ନୟାଗଡ:ବହୁ ଚର୍ଚ୍ଚିତ ନୟାଗଡ ନାବାଳିକା ହତ୍ୟା ମାମଲାରେ ଗିରଫ ହୋଇଥିବା ଅଭିଯୁକ୍ତ କଲେଜ ଛାତ୍ରର ଆଜି ରିମାଣ୍ଡ ଅବଧି ଶେଷ ହେବ । ଏସଆଇଟି ଅଭିଯୁକ୍ତକୁ 3 ଦିନିଆ ରିମାଣ୍ଡରେ ନେଇଥିବା ବେଳେ ଆଜି ତାର ଅବଧି ସରୁଛି । ଫଳରେ ଆଜି ପୁଣି ଅଭିଯୁକ୍ତକୁ କୋର୍ଟରେ ହାଜର କରାଯିବ ।

ହତ୍ୟା ଓ ଦୁଷ୍କର୍ମ ମାମଲାରେ ଅଧିକ ପ୍ରମାଣ ସଂଗ୍ରହ ପାଇଁ ଏସଆଇଟି ଅଭିଯୁକ୍ତ କଲେଜ ଛାତ୍ରକୁ ରିମାଣ୍ଡରେ ନେଇଥିଲା । ଏହି ସମୟରେ ଏସଆଇଟି ଅନେକ ତଥ୍ୟ ହାସଲ କରିଥିବା ଜଣାପଡିଛି । ରିମାଣ୍ଡ ସମୟରେ ଅଭିଯୁକ୍ତ ଠାରୁ ସୂଚନା ପାଇ ଟ୍ରଙ୍କରେ ଥିବା ଗାମୁଛାକୁ ଜବତ କରିଛି ଏସଆଇଟି ।

ଏହି ଗାମୁଛାରେ କୁନି ଝିଅକୁ ହତ୍ୟା କରିବା ପରେ ନାକରୁ ବାହାରି ଥିବା ରକ୍ତକୁ ଅଭିଯୁକ୍ତ ପୋଛିଥିବା କୁହାଯାଇଛି । ଯାହାକୁ ଜବତ କରିଛି ଏସଆଇଟି । ସେହିପରି ଅଭିଯୁକ୍ତର କହିବା ଅନୁସାରେ, ପୋଖରୀରୁ କୁନି ଝିଅର ଲେଙ୍ଗିନ୍ସକୁ ମଧ୍ୟ ଏସଆଇଟି ଓଡ୍ରାଫ ଟିମ୍‌ ସହାୟତାରେ ବାହାର କରିଛି ।

ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ