ନୟାଗଡ: ରାସ୍ତାକାମ ନସରୁଣୁ ଫଳକ ଉଦଘାଟନ କରିବାକୁ ଯାଇ ହଟହଟା ହେଲେ ବିଜେଡି ବିଧାୟକ । ନୟାଗଡ଼ ଜିଲ୍ଲା ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ରାସ୍ତା ନିର୍ମାଣ ନସରୁଣୁ ଆଗୁଆ ବିଲ ଉଠାଇବା ପାଇଁ ଅଧାପନ୍ତରିଆ ରାସ୍ତାକୁ ଉଦଘାଟନ କରିବାକୁ ଯାଇଥିବା ବେଳେ ସ୍ଥାନୀୟ ଲୋକେ ଏହାକୁ ଜୋରଦାର ବିରୋଧ କରିଛନ୍ତି ।
ବିଧାୟକଙ୍କ ସମେତ ଗାଁକୁ ଯାଇଥିବା ଅନ୍ୟ ନେତାମାନଙ୍କୁ ଗାଁ ଲୋକେ ପ୍ରାୟ ଦେଢ଼ ଘଣ୍ଟା ଧରି ଅଟକ ରଖିବା ସହ ନିର୍ମାଣ ନସରୁଣୁ କିଭଳି ଫଳକ ଉଦଘାଟନ ହେବ ବୋଲି ପ୍ରଶ୍ନ କରିଥିଲେ । ନୟାଗଡ ଜିଲ୍ଲା ଗଣିଆ ବ୍ଲକ ବଡମୂଳ ଠାରୁ ଶିଖରଗୋଛା ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡ଼କର ଶୁଭ ଉଦଘାଟନ କାର୍ଯ୍ୟକୁ ନେଇ ବିଧାୟକ ଓ ସ୍ଥାନୀୟ ବିଜେଡି ନେତାଙ୍କୁ ଏଭଳି ହଟହଟା ହେବାକୁ ପଡ଼ିଥିବା ବେଳେ ଏନେଇ ରାସ୍ତା ଅବରୋଧ କରି ବସିଥିଲେ ଶତାଧିକ ଜନସାଧାରଣ l ଉକ୍ତ ରାସ୍ତାକୁ ଉଦଘାଟନ କରିବାକୁ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରାଙ୍କ ସମେତ କିଛି ସ୍ଥାନୀୟ ଜନପ୍ରତିନିଧି ଯାଉଥିବା ସମୟରେ ବଡମୂଳ ବନବିଭାଗର ଫାଟକ ନିକଟରେ ରାସ୍ତା ଅବରୋଧ କରି ସ୍ଥାନୀୟ ବାସିନ୍ଦା ସେମାନଙ୍କୁ ଛାଡ଼ିନଥିଲେ l