ନୟାଗଡ଼: ପୁରୀ ଶ୍ରୀମନ୍ଦିର ସହ ସମ ନୀତିକାନ୍ତି ଏବଂ ପୁରୀ ଜଗନ୍ନାଥ ମନ୍ଦିର ସହ ସାମଞ୍ଜସ୍ୟ ରଖୁଥିବା ନୟାଗଡ଼ ଜିଲ୍ଲା ରଣପୁର ଜଗନ୍ନାଥ ମନ୍ଦିରର(Ranpur Jagannath temple) ଉନ୍ନତି ପାଇଁ ଦାବି କରିଛନ୍ତି ଜଗନ୍ନାଥ ସେନା ଏବଂ ଜନସାଧାରଣ l ରାଜ୍ୟ ସରକାର ଅନ୍ୟ ମନ୍ଦିର ପ୍ରତି ଅନୁକମ୍ପା ଦେଖାଉଥିଲେ ମଧ୍ୟ ରଣପୁର ଜଗନ୍ନାଥ ମନ୍ଦିରର ଉନ୍ନତି ପାଇଁ କୌଣସି ପଦକ୍ଷେପ ଗ୍ରହଣ ନ କରିବାକୁ ନେଇ ବଢୁଛି ଅସନ୍ତୋଷ l ଅନ୍ୟ ମନ୍ଦିରର ବିକାଶ ପାଇଁ ସରକାର କୋଟି କୋଟି ଟଙ୍କାର ପ୍ୟାକେଜ ଘୋଷଣା କରୁଛନ୍ତି ମାତ୍ର ରଣପୁର ଜଗନ୍ନାଥ ମନ୍ଦିରର ଉନ୍ନତି ପାଇଁ ସେଭଳି କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି l
ରଣପୁର ଜଗନ୍ନାଥ ମନ୍ଦିର ବିକାଶ ପାଇଁ ତେଜୁଛି ଦାବି ପୁରୀ ଜଗନ୍ନାଥ ମନ୍ଦିର ପରେ ରଣପୁର ମନ୍ଦିରର ନିର୍ମାଣ କରାଯାଇଛି l କିନ୍ତୁ ଏତେ ପୁରାତନ ଥିବା ଏହି ମନ୍ଦିରର କୌଣସି ଉନ୍ନତି ନାହିଁ l କିମ୍ବଦନ୍ତୀ ଅନୁସାରେ ପ୍ରାଚୀନ ରଣାସୁରପୁର ଯାହାକି ଆଧୁନିକ ରଣପୁରର ରାଜା ଉଦ୍ଧବ ନରେନ୍ଦ୍ର, ମହାପ୍ରଭୁ ଶ୍ରୀ ଜଗନ୍ନାଥଙ୍କ ପରମ ଭକ୍ତ ଥିଲେ l ସେ ପ୍ରତିଦିନ ସ୍ନାନ ସାରି ମହାପ୍ରଭୁଙ୍କୁ ଦର୍ଶନ ପାଇଁ ଅଶ୍ବ ଆରୋହଣ କରି ଶ୍ରୀକ୍ଷେତ୍ର ଯାଇଥାନ୍ତି l
ଏହାମଧ୍ୟ ପଢନ୍ତୁ:Man Returned Home After 24 Years: 24 ବର୍ଷ ପରେ ଫେରିଲା ହଜିଲା ପୁଅ, ପରିବାରରେ ଖୁସିର ଲହରି
ଏକଦା ନଦୀରେ ବନ୍ୟାଜଳ ପ୍ରବାହିତ ଯୋଗୁଁ ଉଦ୍ଧବ ଶ୍ରୀକ୍ଷେତ୍ର ଯାଇ ନ ପାରିବାରୁ ବ୍ରତ ଭଙ୍ଗ ହୋଇଥିଲା l ପରଦିନ ପୁରୀ କଳ୍ପବଟ ମୂଳେ 7 ଦିନ ଧରି ସେ ଅଧିଆ ପଡିଲେ l ଫଳରେ ତତ୍କାଳୀନ ପୁରୀ ଗଜପତି ପ୍ରତାପରୁଦ୍ର ଦେବ ଏବଂ ଉଦ୍ଧବଙ୍କୁ ସ୍ବପ୍ନାଦେଶ ହୋଇଥିଲା ଯେ, ପ୍ରଭୁଙ୍କ ଷୋଳ କଳାରୁ ଏକ କଳା ରଣପୁର ଯିବ l ପ୍ରଭୁଙ୍କ ନିର୍ଦ୍ଦେଶ ଅନୁସାରେ ଉଦ୍ଧବ ନରେନ୍ଦ୍ର 1363 ସାଲରେ ରଣପୁରରେ ଜଗନ୍ନାଥ ମନ୍ଦିର ନିର୍ମାଣ କରିଥିଲେ l
ତତ୍କାଳୀନ ଗଜପତି ପ୍ରତାପରୁଦ୍ର ଦେବ ରଣପୁର ରାଜା ଉଦ୍ଧବ ନରେନ୍ଦ୍ରଙ୍କ ଶିରରେ ଶାଢ଼ୀ ବାନ୍ଧି ନରେନ୍ଦ୍ର ଉପାଧିରେ ବିଭୂଷିତ କରିଥିଲେ l ଏବଂ ପୁରୀର ନରେନ୍ଦ୍ର ପୁଷ୍କରିଣୀ ରଣପୁର ରାଜା ଉଦ୍ଧବ ନରେନ୍ଦ୍ର ହିଁ ଖୋଳାଇ ଥିଲେ । ଭୌଗୋଳିକ, ପୌରାଣିକ,କିମ୍ବଦନ୍ତୀ ,ଏବଂ ଇତିହାସରେ ରଣପୁର ଜଗନ୍ନାଥ ମନ୍ଦିରର ଗୁରୁତ୍ବ ରହିଛି l ତେଣୁ ରଣପୁରର ସେବାୟତ, ଜଗନ୍ନାଥ ସେନା ଏବଂ ଗବେଷକ ମାନେ ଗତ ବର୍ଷ ସଂସ୍କୃତି ମନ୍ତ୍ରୀଙ୍କୁ ଭେଟି ଦ୍ବିତୀୟ ଶ୍ରୀକ୍ଷେତ୍ର ଘୋଷଣା ପାଇଁ ଦାବି କରିବା ସହ ଏହାର ବିକାଶ ଦାୟିତ୍ବ ସରକାର ହାତକୁ ନେବା ପାଇଁ ଦାବି କରିଥିଲେ l ଏହି ଦାବିକୁ ଜନସାଧାରଣ ଏବଂ ଜଗନ୍ନାଥ ସେନା ପୁଣି ଦୋହରାଇଛି l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
