ଦ୍ବିତୀୟ ଶ୍ରୀକ୍ଷେତ୍ରରେ ରଥଯାତ୍ରା ଦାବି

ରଣପୁର ଦ୍ବିତୀୟ ଶ୍ରୀକ୍ଷେତ୍ରରେ ରଥଯାତ୍ରା ପାଇଁ ବଡ଼ଦାଣ୍ଡରେ ଗର୍ଜିଲେ ଲୋକେ । ଘଣ୍ଟ, ଝାଞ୍ଜ, ମୃଦଙ୍ଗରେ କମ୍ପିଲା ବଡଦାଣ୍ଡ । ଅଧିକ ପଢ଼ନ୍ତୁ...

ନୟାଗଡ଼: ଦ୍ବିତୀୟ ଶ୍ରୀକ୍ଷେତ୍ର କୁହାଯାଉଥିବା ନୟାଗଡ଼ ଜିଲ୍ଲା ରଣପୁରରେ ରଥଯାତ୍ରା ପାଇଁ ବଡ଼ଦାଣ୍ତରେ ଗର୍ଜିଲେ ଲୋକେ l ଘଣ୍ଟ, ଝାଞ୍ଜ, ମୃଦଙ୍ଗରେ ରଣପୁର ବଡ଼ ଦାଣ୍ଡ ପ୍ରକମ୍ପିତ କରିବା ସହ ହାତରେ ପ୍ଲାକାର୍ଡ ଧରି ରଥଯାତ୍ରା ପାଇଁ ଅନୁମତି ଦାବି କରିଛନ୍ତି l

ଜଗନ୍ନାଥ ସେନା ନେତୃତ୍ବରେ ଦ୍ବିତୀୟ ଶ୍ରୀକ୍ଷେତ୍ରରେ କୋଭିଡ଼ ଗାଇଡ଼ଲାଇନ ମଧ୍ୟରେ ରଥଯାତ୍ରା କରିବା ପାଇଁ ଜଗନ୍ନାଥ ସେନା, ବଣିକ ସଂଘ, ସାମ୍ବାଦିକ ସଂଘ, ଓକିଲ ସଂଘ ଏବଂ ସାଧାରଣ ନାଗରିକ ଦାବି କରି ରଣପୁରରେ ବିରାଟ ଶୋଭାଯାତ୍ରା କରିଛନ୍ତି l ରଣପୁର ମାଉସୀ ମା' ମନ୍ଦିର ଠାରୁ ରଣପୁର ତହସିଲ ଅଫିସ ପର୍ଯ୍ୟନ୍ତ ଏକ ବିରାଟ ଶୋଭାଯାତ୍ରାରେ ଯାଇ ତହସିଲଦାରଙ୍କୁ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଦାବି ପତ୍ର ପ୍ରଦାନ କରିଥିଲେ l

କୋଭିଡ଼ ଗାଇଡ଼ଲାଇନ ମଧ୍ୟରେ ଦ୍ବିତୀୟ ଶ୍ରୀକ୍ଷେତ୍ରରେ ରଥଯାତ୍ରା ପାଇଁ ଦାବି ହୋଇଛି l ପୁରୀ ଜଗନ୍ନାଥଙ୍କ 16 କଳାରୁ ରଣପୁର ଜଗନ୍ନାଥଙ୍କ ପାଖରେ ଗୋଟିଏ କଳା ରହିଛି l ସେହିପରି ପୁରୀ ଶ୍ରୀମନ୍ଦିର ସହ ସାମଞ୍ଜସ୍ୟ ରଖୁଥିବା ରଣପୁର ଶ୍ରୀମନ୍ଦିରରେ ପୁରୀ ଭଳି ସମସ୍ତ ନୀତିକାନ୍ତି ହୋଇଥାଏ l ପୁରୀ ପରେ ରଣପୁର ଜଗନ୍ନାଥ ମନ୍ଦିରର ଗୁରୁତ୍ବ ଥିବାରୁ ସରକାର ରଥଯାତ୍ରା ପାଇଁ ଅନୁମତି ଦେବାକୁ ଦାବି ହୋଇଛି l ନଚେତ ଆଗାମୀ ଆନ୍ଦୋଳନ ତୀବ୍ର ହେବ ବୋଲି ଲୋକେ କହିଛନ୍ତି l

ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ