ନୟାଗଡ଼:ଜିଲ୍ଲାର ଖୁଣ୍ଟୁବନ୍ଧ ଗ୍ରାମ ପଞ୍ଚାୟତ ଅଶ୍ବସ୍ଥପଡ଼ା ଗ୍ରାମର ସ୍ବର୍ଗତ ଛାଟିଆ ରାଉତଙ୍କ ପୁଅ ଦଣ୍ଡୁ ରାଉତ । ବୟସ 28 ବର୍ଷ । କିନ୍ତୁ ଦଣ୍ଡୁ ଏବେ ଅଜଣା ରୋଗରେ ଆକ୍ରାନ୍ତ । ଡାକ୍ତର ରୋଗ ଚିହ୍ନି ପାରୁନାହାଁନ୍ତି । ଫଳରେ ଦିନ ଦିନକୁ ତାଙ୍କ ଶରୀର ଅସୁସ୍ଥ ହେବାରେ ଲାଗିଛି । ଦେହ ଦୁର୍ବଳ ହେଉଥିବାରୁ କଥା ପଦେ କହିବାକୁ ଅକ୍ଷମ । କିଛି ବର୍ଷ ପୂର୍ବେ ଦଣ୍ଡୁଙ୍କ ବାପା ଆରପାରିକୁ ଚାଲିଯାଇଛନ୍ତି । 28 ବର୍ଷୀୟ ଦଣ୍ଡୁଙ୍କ ଉପରେ ପରିବାର ନିର୍ଭରଶୀଳ । କିନ୍ତୁ ଦଇବ ଶାହା ହେଲାନି । ରୋଗରେ ପଡ଼ିଲେ ଦଣ୍ଡୁ l
ଦଣ୍ଡୁଙ୍କୁ ଛାଡ଼ି ଘରେ ଆଉ କେହି ରୋଜଗାରିଆ ନାହାଁନ୍ତି । ବାପାଙ୍କ ମୃତ୍ୟୁ ପରେ ଏକମାତ୍ର ରୋଜଗାରିଆ ପୁଅ ରୋଗରେ ପୀଡ଼ିତ । ଘରେ 4 ପ୍ରାଣୀ କୁଟୁମ୍ବ ଚଳିବା କଷ୍ଟ । 3 ବର୍ଷ ହେବ ଦଣ୍ଡୁ ବିବାହ କରିଛନ୍ତି । ତାଙ୍କର ଝିଅଟିଏ ମଧ୍ୟ ଅଛି । ଦଣ୍ଡୁ ରାଉତ ଅସୁସ୍ଥ ଅଟନ୍ତି । ମେଡିକାଲ ନେଇ ଡାକ୍ତରଙ୍କୁ ଦେଖାଇଲେ ମଧ୍ୟ ଡାକ୍ତର ରୋଗକୁ ଚିହ୍ନଟ କରିପାରୁନାହାଁନ୍ତି । ମେଡିକାଲ ଯାଇ ଯାଇ ପରିବାର ଲୋକେ ବହୁତ ଖର୍ଚ୍ଚାନ୍ତ ହେଲେଣି l ଯାହା ଅର୍ଥ ଥିଲା ସବୁ ସରିଗଲାଣି । ଆଗକୁ ଚିକିତ୍ସା ପାଇଁ ଏବେ ଅର୍ଥ ସାଜିଛି ବାଧକ ।