ନୟାଗଡ଼: ଶାସ୍ତ୍ରୀୟ ନୃତ୍ୟର ମାନ୍ୟତା ପାଇଛି ଓଡିଶୀ । ଓଡ଼ିଶାର କଳା, ସଂସ୍କୃତି, ସାହିତ୍ୟର ନିଚ୍ଛକ ନିଦର୍ଶନ ଓଡ଼ିଶୀ । ଏହି ଓଡିଶୀ ସହ ନିଜଜୁ ସମର୍ପି ଦେଇଛନ୍ତି ଲିମା ଦାସ । ଓଡିଶୀ ତାଙ୍କୁ ଦେଇଛି ସ୍ୱତନ୍ତ୍ର ପରିଚୟ ଏବଂ ଓଡ଼ିଶୀର ପ୍ରଚାର ପ୍ରସାର ପାଇଁ ଉଦ୍ୟମ କରୁଛନ୍ତି । ଗ୍ରାମାଞ୍ଚଳର ଛାତ୍ରଛାତ୍ରୀଙ୍କୁ ଦେଉଛନ୍ତି ମାଗଣା ଓଡିଶା ଶିକ୍ଷା । ଦୀର୍ଘ ୮ ବର୍ଷ ଧରି ସେ ଏଭଳି ନୃତ୍ୟ ଶିଖାଇ ଆସୁଥିବା ବେଳେ ଆଜି ମଧ୍ୟ ସରକାରଙ୍କ ନଜର ଆଢୁଆଳରେ ରହିଛନ୍ତି । ପିଲାଙ୍କ ନୃତ୍ୟ ସରଞ୍ଜାମ ପାଇଁ ଅନେକ ଅର୍ଥ ଆବଶ୍ୟକ ହେଉଥିବା ବେଳେ ଏହି ଶାସ୍ତ୍ରୀୟ ନୃତ୍ୟର ପ୍ରଚାର ପ୍ରସାର ପାଇଁ ସେ ସରକାରଙ୍କ ସହଯୋଗ ଲୋଡିଛନ୍ତି ।
ଲିମା ସବୁବେଳେ କୁନି କୁନି ପିଲାଙ୍କୁ ଓଡିଶୀ ଶିକ୍ଷା ଦେଉଛନ୍ତି । ଲିମାଙ୍କ ଘର ନୟାଗଡ଼ ଜିଲ୍ଲା ରାଜସୁନାଖଳାରେ । ପାଖାପାଖି ଏକ ଦଶନ୍ଧି ହେବ ଓଡିଶୀ ନୃତ୍ୟ ପ୍ରଚାର ପ୍ରସାର ପାଇଁ କାର୍ଯ୍ୟ କରୁଛନ୍ତି । ନିଜେ ଜଣେ ଓଡିଶୀ ନୃତ୍ୟଙ୍ଗନା । ନିଜ ଅଞ୍ଚଳରୁ ଆରମ୍ଭ କରି ଦେଶ ବିଦେଶରେ ସେ ନାଁ କରିଛନ୍ତି । ସିଙ୍ଗାପୁର, ଜାପାନ ଆଦି ବିଦେଶ ଯାଇ ଓଡିଶୀ ନୃତ୍ୟ ଦେଖାଇଛନ୍ତି । କୁନି କୁନି ଛାତ୍ରଛାତ୍ରୀଙ୍କ ନେଇ ଅନେକ ମଞ୍ଚରେ ଓଡିଶୀ ନୃତ୍ୟକୁ ପ୍ରଦର୍ଶନ କରିଛନ୍ତି । ଯାହା ତାଙ୍କୁ ଅନେକ ସମ୍ମାନ ଏବଂ ପୁରସ୍କାର ଦେଇଛି । ଓଡିଶୀ ନୃତ୍ୟ ଶିକ୍ଷା ଦେଇ ସେ ଚର୍ଚ୍ଚାରେ ରହିଆସିଛନ୍ତି ।