ଖୋର୍ଦ୍ଧା/ନୟାଗଡ଼ : ଦିନକୁ ଦିନ ମୁଣ୍ଡ ନେବାରେ ଲାଗିଛି ସଡ଼କ ଦୁର୍ଘଟଣା । ବେପରୁଆ ଗାଡ଼ି ଚାଳନା ହେଉ ଅବା ଅସାବଧାନତା ପାଇଁ ଅକାଳରେ ଚାଲି ଯାଉଛି ନିରୀହ ଜୀବନ । ଦୁର୍ଘଟଣାରେ ନିଜ ଆତ୍ମୀୟ ସ୍ବଜନକୁ ହରାଇ ଦୁଃଖରେ ଭାଙ୍ଗି ପଡ଼ୁଛନ୍ତି ପରିବାର । ତେବେ ପୁଣି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଦେଖିବାକୁ ମିଳିଛି ନୟାଗଡ଼ ଜିଲ୍ଲା ଦଶପଲ୍ଲା ଥାନା ଜାତୀୟ ରାଜପଥ ନଂ ୫୭ ସୁବଳୟା ଛକ ନିକଟରେ । ଯେଉଁଥିରେ ତିନିଜଣ ଯୁବ ବ୍ୟବସାୟୀଙ୍କ ଜୀବନ ଯାଇଛି ।
ସୂଚନା ଅନୁସାରେ, ନୟାଗଡ଼ ଜିଲ୍ଲା ଦଶପଲ୍ଲା ଥାନା ଅଧିନ ଜାତୀୟ ରାଜପଥ ନଂ ୫୭ ସୁବଳୟା ଛକ ନିକଟରେ ଏକ କାର ଗାଡ଼ି ସହ ବାଇକ୍ ମୁହାଁମୁହିଁ ଧକ୍କା ହୋଇଥିଲା । ଫଳରେ ଏହି ଭୟଙ୍କ ଦୁର୍ଘଟଣାରେ ତିନିଜଣ ଯୁବ ବ୍ୟବସାୟୀଙ୍କ ମୃତ୍ୟୁ ହୋଇଛି । ମୃତ ବ୍ୟବସାୟୀ ହେଲେ ଦିପୁ, ଶିତୁ ଓ ଗୋକୁଳ । ସମସ୍ତେ ଦଶପଲ୍ଲା ଅଞ୍ଚଳର ବୋଲି ଜଣାପଡ଼ିଛି । ସେପଟେ ଘଟଣା ସ୍ଥଳରେ ଦୁର୍ଘଟଣା ଘଟାଇଥିବା କାର ରହିଥିବା ବେଳେ ଦଶପଲ୍ଲା ପୋଲିସ ପହଞ୍ଚି କାର ଗାଡ଼ିକୁ ଜବତ କରିଛି ।
ତେବେ ଏଭଳି ଏକ ଦୁଃଖଦ ଘଟଣାକୁ ନେଇ ଦଶପଲ୍ଲା ଅଞ୍ଚଳରେ ଶୋକର ଛାୟା ଖେଳି ଯାଇଛି । ପୋଲିସ ଦୁର୍ଘଟଣା ଘଟାଇ ଥିବା ଗାଡ଼ି ଚାଳକ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବା ସହ ସରକାରୀ ସହାୟତା ପ୍ରଦାନ ପାଇଁ ବୁଦ୍ଧିଜୀବୀ ମହଲରେ ଦାବି ହୋଇଛି । ଅନ୍ୟପଟେ ମୃତ ତିନି ଯୁବକ ହେଲମେଣ୍ଡ ପିନ୍ଧି ନଥିଲେ । ଯାହାଦ୍ଵାରା ସେମାନଙ୍କ ମୁଣ୍ଡରେ ଗଭୀର କ୍ଷତ ହୋଇ ଜୀବନ ଚାଲିଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି ।