ନୟାଗଡ: ନୟାଗଡରେ ପୁଣି ଶିଶୁ ନିଖୋଜ ନେଇ ଚର୍ଚ୍ଚା । ରଣପୁର ଥାନା ଅଧିନ ନରେନ୍ଦ୍ରପୁର ବଧିପାଟଣା ଗାଁର ସଞ୍ଜୟ କୁମାର ସାହୁ ଏବଂ ସବିତାଙ୍କ ୩ ବର୍ଷର ଶିଶୁ କନ୍ୟା ହରପ୍ରିୟା ସାହୁ (ସ୍ଵାତି) । ଯିଏକି ଗତକାଲି(ଶୁକ୍ରବାର) ଅପରାହ୍ନ 3 ଟାରେ ଘର ପଛଟକୁ ଖେଳିବାକୁ ଯାଇଥିଲେ l ମାତ୍ର ଆଉ ଘରକୁ ଫେରି ନଥିଲେ । ବହୁ ଖୋଜାଖୋଜି କଲା ପରେ ବିଫଳ ହେବାରୁ ପରିବାର ପକ୍ଷରୁ ରାଜସୁନାଖଳା ଫାଣ୍ଡିରେ ଝିଅ ନିଖୋଜ ଥିବା ନେଇ ଏକ ଅଭିଯୋଗ ହୋଇଛି ।
ଜିଲ୍ଲାରେ ପରୀ ଅପହରଣ ଓ ହତ୍ୟା ମାମଲାକୁ ନେଇ ସାରା ରାଜ୍ୟରେ ଚାଞ୍ଚଲ୍ୟ ଖେଳିଯାଇଥିବାବେଳେ, କୁନି ଝିଅଟି ନିଖୋଜ ହେବାକୁ ନେଇ ଅଞ୍ଚଳବାସୀଙ୍କ ମନରେ କୋକୁଆ ଭୟ ସୃଷ୍ଟି ହେବା ସହ ନାନାକଳ୍ପନା ଜଳ୍ପନା ପ୍ରକାଶ ପାଇଛି । ଅନ୍ୟପଟେ ଅଗ୍ନିଶମ ବାହିନୀ ପକ୍ଷରୁ ସ୍ଥାନୀୟ ସମସ୍ତ ଜଳାଶୟ ଗୁଡିକୁ ତନ୍ନ ତନ୍ନ କରି ଯାଞ୍ଚ କରାଯାଉଛି । କିନ୍ତୁ ବର୍ତ୍ତମାନ ସୁଦ୍ଧା କୌଣସି ଖୋଜଖବର ମିଳି ପାରିନାହିଁ l ପୋଲିସ ଗାଁରେ ରହି ଚତୁଃପାର୍ଶକୁ ତଦନ୍ତ କରୁଛି l ଶରଣକୁଳ SDPO ଏସ ଟପ୍ପୋ, ଆଇଆଇସି ଜ୍ୟୋତି ପ୍ରକାଶ ପଣ୍ଡା ଘଟଣାସ୍ଥଳରେ ଉପସ୍ଥିତ ଅଛନ୍ତି ।
ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ