ହାଇଦ୍ରାବାଦକୁ ଦାଦନ ଖଟିବାକୁ ଯାଇ ଯୁବକ ନିଖୋଜ, ଖୋଜିଆଣିବାକୁ ବାପାଙ୍କ ନିବେଦନ

ନବରଙ୍ଗପୁର ଜିଲ୍ଲା କୋଡ଼ିଙ୍ଗା ଥାନା ଅନ୍ତର୍ଗତ ରାବଣାଗୁଡା ଗ୍ରାମର ଜଣେ ଯୁବକ ହାଇଦ୍ରାବାଦକୁ ଦାଦନ ଖଟିବାକୁ ଯାଇ ନିଖୋଜ ହୋଇଯାଇଛନ୍ତି ।

ନବରଙ୍ଗପୁର: ହାଇଦ୍ରାବାଦକୁ ଦାଦନ ଖଟିବାକୁ ଯାଇ ଯୁବକ ନିଖୋଜ । ନବରଙ୍ଗପୁର ଜିଲ୍ଲା କୋଡ଼ିଙ୍ଗା ଥାନା ଅନ୍ତର୍ଗତ ରାବଣାଗୁଡା ଗ୍ରାମର ଜଣେ ଯୁବକ ନିଖୋଜ ହୋଇଯାଇଥିବା ନେଇ ଯୁବକଙ୍କ ପିତା କୋଡ଼ିଙ୍ଗା ଥାନାରେ ଏତଲା ଦେଇଥିବା ସୂଚନା ମିଳିଛି ।

ନିଖୋଜ ଯୁବକର ନାମ ରାବଣାଗୁଡା ଗ୍ରାମର ଲଖୁମୁ ଭତରା ବୟସ ୨୦ ବର୍ଷ । ସେହି ଗ୍ରାମର ଦାମୁ ଗୌଡ଼, ମୁରଲୀ ହଲବା, ପଣ୍ଡା ଭତରା ଏବଂ କୈଳାଶ ଦାଶ ଏହି ୫ ଜଣ ଗତ ୩ମାସ ତଳେ ପରିବାର ଚଳାଇବା ପାଇଁ ଦାଦନ ଖଟିବାକୁ ଆନ୍ଧ୍ରପ୍ରଦେଶର ହାଇଦ୍ରାବାଦ ଯାଇଥିଲେ । ହେଲେ ଚଳିତ ମାସ ୧୦ ତାରିଖ ଦିନ ଲଖୁମୁ ଭତରା କେଉଁ ଆଡେ ଚାଲିଯାଇଥିବା ନେଇ ସାଥିରେ ଯାଇଥିବା ୪ ଜଣ ଯୁବକମାନେ ଫୋନ କରି ଲଖୁମୁର ପିତା ଗଙ୍ଗାଧର ଭାତରଙ୍କୁ କହିଥିଲେ ।

ଏନେଇ ସାଥିରେ ଯାଇଥିବା ଯୁବକମାନେ ହାଇଦ୍ରାବାଦ ଥାନାରେ ଏତଲା ଦେଇଥିଲେ । ଆଜି ନିଖୋଜ ଥିବା ଯୁବକର ପିତା ଗଙ୍ଗାଧର ଭତରା କୋଡ଼ିଙ୍ଗା ଥାନାରେ ଏତଲା ଦେଇଛନ୍ତି ଓ ନିଖୋଜ ପୁଅକୁ ଖୋଜିଆଣିବାକୁ ନିବେଦନ କରିଛନ୍ତି । ଏନେଇ କୋଡ଼ିଙ୍ଗା ପୁଲିସ ପକ୍ଷରୁ ଏକ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡିଛି ।

ନବରଙ୍ଗପୁରରୁ ତପନ ବିଶୋଇ, ଇଟିଭି ଭାରତ