ନବରଙ୍ଗପୁରରୁ ଲକ୍ଷାଧିକ ଟଙ୍କାର ଚୋରା କାଠ ଜବତ, 2 ଗିରଫ

ଉମରକୋଟ ବନ ବିଭାଗର ଚଢାଉ । 17ଟି ଶାଗୁଆନ କାଠଗଣ୍ଡି ସହ ଏକ 407 ଗାଡି ଜବତ କଲା ବିଭାଗ ।

ନବରଙ୍ଗପୁର: ଉମରକୋଟ ବନବିଭାଗକୁ ବଡ ସଫଳତା । ଲକ୍ଷାଧିକ ଟଙ୍କାରୁ ଊର୍ଦ୍ଧ୍ବ ମୂଲ୍ୟର 17 ଗୋଟି ଶାଗୁଆନ କାଠଗଣ୍ଡି ସହ ଏକ 407 ଗାଡି ଜବତ କରିଛି । ଏଥିସହ ଦୁଇ ଜଣକୁ ଗିରଫ କରିଛି ଉମରକୋଟ ବନବିଭାଗ ।

ଏହି ଚୋରା କାଠ ବେପାରୀକୁ ଧରିବା ପାଇଁ ବହୁତ ଦିନରୁ ବନବିଭାଗର ପ୍ରୟାସ ଥିଲା । କାଠ ଗୁଡିକ ଏମାନେ ଓଡିଶା ଛତିଶଗଡ ସୀମାରୁ ସବୁ ସମୟରେ ଆଣଥାନ୍ତି । ଗତକାଲି ରାତିରେ ଖବର ପାଇ ଉମରକୋଟ ବନବିଭାଗ ଓ 407 ଗାଡି ସହ ଖଡ଼କା ଗାଁ ପାଖରେ ଗାଡିକୁ ଜବତ କରିଥିଲା ।

ଏଥିସହ ଉଭୟ ଡ୍ରାଇଭର ଗଣେଶ ଶବର ଓ ଗାଡି ମାଲିକ ସପନ ମିସ୍ତ୍ରୀକୁ ଗିରଫ କରିଥିଲା ବନବିଭାଗ । ପଚରା ଉଚରାରୁ ଜଣାପଡିଥିଲା ଯେ ରାଇଘର ବ୍ଲକ ସମ୍ବଲପୁର ଗାଁରେ କିଛିଦିନ ତଳୁ ଛତିଶଗଡରୁ ଶାଗୁଆନ କାଠଗଣ୍ଡି ଆଣି ଏମାନେ ଲୁଚେଇ ରଖିଥିଲେ । ରବିବାର ରାତ୍ରି ସମୟରେ ଏହା ଆଣିବା ବେଳେ ବନବିଭାଗ ହାତରେ ଧରାପଡ଼ିଥିଲେ ।

ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ