ନବରଙ୍ଗପୁର: ଓଲଟି ପଡିଲା ଗ୍ୟାସ ସିଲିଣ୍ଡର ବୋଝେଇ ଟ୍ରକ । ମୃତ୍ୟୁ ମୁଖରୁ ଅଳ୍ପକେ ବର୍ତ୍ତିଲେ ଡ୍ରାଇଭର । ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ବନ୍ଧଗୁଡା ଗାଁ ନିକଟରେ ଭାରସାମ୍ୟ ହରାଇ ଏକ ଗ୍ୟାସ ସିଲିଣ୍ଡର ବୋଝେଇ ଟ୍ରକ ଗୁରୁବାର ଦୁର୍ଘଟଣାଗ୍ରସ୍ତ ହୋଇଛି । ହେଲେ ଚାଳକ ଜଣକ ସୁରକ୍ଷିତ ଥିବା ଜଣାପଡ଼ିଛି।
ସୂଚନା ଅନୁଯାୟୀ, ଗୁରୁବାର(ଆଜି) ଓଡି-33 ୟୁ-3142 ନମ୍ବର ଥିବା ଏକ ଗ୍ୟାସ ସିଲିଣ୍ଡର ବୋଝେଇ ଟ୍ରକ କଣ୍ଟାଗାଁରେ ଥିବା ନଳିନୀ ପ୍ରଭା ଇଣ୍ଡିଆନ ଗ୍ୟାସ ଗୋଦାମ ଠାରେ ଗ୍ୟାସ ସିଲିଣ୍ଡର ଖାଲି କରି ଖାଲି ସିଲିଣ୍ଡର ଗୁଡିକୁ ନେଇ ମୈଦଲପୁର ଅଭିମୁଖେ ଯାଉଥିଲା । ହେଲେ ବନ୍ଧଗୁଡା ଗାଁ ନିକଟରେ ଭାରସାମ୍ୟ ହରାଇ ରାସ୍ତା କଡକୁ ଓଲଟି ପଡିଥିଲା । ତେବେ କେଉଁ କାରଣରୁ ଗାଡ଼ିଟି ଓଲଟି ପଡିଲା ଏବେ ସୁଦ୍ଧା ତାହା ଅସ୍ପଷ୍ଟ ରହିଛି । ଏ ସମ୍ପର୍କରେ ଖବର ପାଇ ସୁଦ୍ଧା ଘଟଣାସ୍ଥଳରେ କୌଣସି ପୋଲିସ ପ୍ରଶାସନ ପହଞ୍ଚି ନ ଥିବା ଜଣାପଡ଼ିଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
