ନବରଙ୍ଗପୁର: ଧାନ,ମକା, ଆଖୁ ଓ ନୀଳଗିରି ଗଛ ଭଳି ପାରମ୍ପରିକ ଚାଷ ଛାଡି ଏବେ ଲେମନ ଗ୍ରାସ ଚାଷ କରିବାକୁ ଇଛା ପ୍ରକାଶ କରୁଛନ୍ତି ନବରଙ୍ଗପୁର ଜିଲ୍ଲାର ଚାଷୀମାନେ। ଖୁବ କମ ଖର୍ଚ୍ଚରେ ଅଧିକ ଅମଳ ହେଉଥିବା ଲେମନ ଗ୍ରାସ ଚାଷ ପ୍ରତି ଚାଷୀ ବେଶ ଆକର୍ଷିତ ହେଉଥିବା ଦେଖିବାକୁ ମିଳୁଛି। ନବରଙ୍ଗପୁର ଜିଲ୍ଲାର ପାହାଡିଆ ଉଚ୍ଚା ଡଙ୍ଗର ପଡିଆ ଜମିରେ ଦିନେ କିଛି ଫଳୁ ନଥିଲା ହେଲେ ଆଜି ଚାରିଆଡେ ପୁରା ଘାସର ସବୁଜ ବନାନୀ ପାଲଟିଛି। ଅନ୍ୟ ଚାଷ ଅପେକ୍ଷା ଲେମନ ଗ୍ରାସ ଚାଷ କରିବାକୁ ଚାଷୀଙ୍କୁ କମ ପରିଶ୍ରମ ଓ ଅଳ୍ପ ଖର୍ଚ୍ଚରେ ଚାଷ ହେଉଥିବାରୁ ବିଶେଷ କରି ଯୁବ ଚାଷୀମାନେ ଚାଷ କରୁଛନ୍ତି। ଥରେ ଚାଷ କରି ପାଞ୍ଚ ବର୍ଷ ପର୍ଯ୍ୟନ୍ତ ଅମଳ ହେଉଥିବା ଲେମନ ଗ୍ରାସ ଚାଷ ଅନ୍ୟ ଏକ ଅର୍ଥକାରୀ ଫସଲ ଭାବେ ଉଭା ହୋଇଛି ନବରଙ୍ଗପୁର ଜିଲ୍ଲାରେ।
ଅନ୍ତର୍ଜାତୀୟ ବଜାରରେ ଲେମନ ଗ୍ରାସ ଡିମାଣ୍ଡ, ଥରେ ଚାଷ କରି ମାଲାମାଲ ଚାଷୀ ଜାତୀୟ ଓ ଅନ୍ତର୍ଜାତୀୟ ବଜାରରେ ଲେମନ ଗ୍ରାସର ଢେର ଚାହିଦା ରହିଥିବାବେଳେ ଏହି ଚାଷ କରି ବେଶ ଲାଭବାନ ହୋଇଛନ୍ତି ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଅନ୍ତର୍ଗତ ସିନ୍ଧିଗୁଡା ଗାଁର ଯୁବ ଚାଷୀ କୃଷ୍ଣଚନ୍ଦ୍ର ନାୟକ। ସେ ନିଜର 2 ଏକର ଉଚ୍ଚ ଡଙ୍ଗର ଜମିରେ ଲେମନ ଗ୍ରାସ ଚାଷ କରି ବେଶ ଚର୍ଚ୍ଚାର ପରିସରକୁ ଆସିଛନ୍ତି। ଯେଉଁ ଜମି କିଛି କାମକୁ ଆସୁନଥିଲା ସେହି ଜମିରେ ଲେମନ ଗ୍ରାସ ଚାଷକୁ ଆପଣାଇ ନିଜର ପାରିବା ପଣିଆ ଦେଖାଇଲେ । ଥରେ ଚାଷ କରି ପାଞ୍ଚ ବର୍ଷ ପର୍ଯ୍ୟନ୍ତ ଅମଳ କରି ମାଲାମାଲ ହେଉଛନ୍ତି କୃଷ୍ଣଚନ୍ଦ୍ରଙ୍କ ଭଳି ଅନେକ ଯୁବ ଚାଷୀ । ଲେମନ ଗ୍ରାସରୁ ଏକ ସୁଗନ୍ଧିତ ତୈଳ ପ୍ରସ୍ତୁତ କରି ଲିଟର ପିଛା ଏକ ହଜାର ଟଙ୍କା ବିକ୍ରି ହେଉଥିବା ଆଉ କିଛି ଚା ଗୁଣ୍ଡ ତିଆରି କରି ବିକ୍ରୀ ହେଉଛି। ଅନେକ ଚାଷୀ ତିନି ମାସରେ ଥରେ କେବଳ ଲେମନ ଗ୍ରାସ କାଟି ବିକ୍ରି କରି ବେଶ ଲାଭବାନ ହେଉଥିବା ସୂଚନା ଦେଇଛନ୍ତି ଜିଲ୍ଲାର ଯୁବ ଚାଷୀ।
କୃଷି ବିଭାଗ ତରଫରୁ ବିଭିନ୍ନ ଯୋଜନାରେ ମାଗଣାରେ ଏହି ଲେମନ ଗ୍ରାସ ବିହନ ଆକାରରେ ଯୋଗାଇ ଦିଆଯାଇଛି ଓ ଏହାର ଫାଇଦା ନେଇଛନ୍ତି ଯୁବ ଚାଷୀ । ଗତ ଦୁଇ ବର୍ଷ ମଧ୍ୟରେ ପ୍ରତିବର୍ଷ ଶହେ ଏକର ଲେମନ ଗ୍ରାସ ଚାଷ କରାଯାଉଥିବା ଜଣାପଡ଼ିଛି।ଖୁବ କମ ଦିନରେ ଏହି ଚାଷ ଲୋକପ୍ରିୟ ହେବାରେ ଲାଗିଛି। ଯୁବ ଚାଷୀମାନେ ଲେମନ ଗ୍ରାସ ଚାଷ କରିବାକୁ ଆଗ୍ରହୀ ଥିବା ଜଣାପଡିଛି।
ଲେମନ ଗ୍ରାସ ଚାଷ ନବରଙ୍ଗପୁର ମାଟିରେ ସୁହାଉ ଥିବା ଓ କମ ଟଙ୍କା ମୂଳ ପୁଞ୍ଜି ବିନିଯୋଗ କରି ଅଧିକ ଲାଭ ହେଉ ଥିବାରୁ ଏହି ଲେମନ ଗ୍ରାସ ଚାଷ ପ୍ରତି ଆକୃଷ୍ଟ ହୋଇ ଅଧିକରୁ ଅଧିକ ଯୁବ ଚାଷୀ ଚାଷ କରିବା ଜିଲ୍ଲା ପାଇଁ ଏକ ଶୁଭଙ୍କର ସୂଚନା।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
