ନବରଙ୍ଗପୁର: ପାପଡ଼ାହାଣ୍ଡିସ୍ଥିତ ଟୁରି ନଦୀ କୂଳରେ ଶହୀଦ ଦିବସ ଅନୁଷ୍ଠିତ । ଇଂରେଜ ମାନଙ୍କ ବିରୋଧରେ ଭାରତ ଛାଡ଼ ଆନ୍ଦୋଳନ ଡାକରାରେ ଅନୁପ୍ରାଣିତ ହୋଇ ଏଠାରେ ଗଢ଼ି ଉଠିଥିବା ମେଳିକୁ ଘୋଉଡାଇବା ପାଇଁ ଆଜିର ଦିନରେ ଇଂରେଜ ସରକାରଙ୍କ ପୋଲିସ ପକ୍ଷରୁ ଗୁଳି ଚାଳନା କରାଯାଇଥିଲା । ଏଥିରେ ୧୯ ଜଣ ବୀର ପୁରୁଷ ଶହୀଦ ହୋଇଥିଲେ । ତେବେ ସେମାନଙ୍କୁ ମନେ ପକାଇବା ପାଇଁ ପ୍ରତିବର୍ଷ ଆଜିର ଦିନରେ ଏହି ଦିବସ ପାଳନ କରାଯାଏ ।
ପ୍ରକୃତିର ଗନ୍ତାଘରରେ ପରିପୂର୍ଣ୍ଣ ଏକ ପଛୁଆ ଜିଲ୍ଲା ଭାବେ ପରିଚିତ ନବରଙ୍ଗପୁର ଜିଲ୍ଲା l କିନ୍ତୁ ଏହି ଉପାନ୍ତ ଅଞ୍ଚଳର ମହତ କାର୍ଯ୍ୟ ସ୍ବାଧୀନତା ସଂଗ୍ରାମର ଇତିହାସରେ ସବୁବେଳେ ଚିର ସ୍ମରଣୀୟ l 1942 ମସିହା ଅଗଷ୍ଟ 9 ତାରିଖ ରେ 'ଭାରତ ଛାଡ଼ ଆନ୍ଦୋଳନ' ଆରମ୍ଭ ହେବା ପରେ ତାହାର ବିଶେଷ ପ୍ରଭାବ ପଡିଥିଲା ଏଠାରେ l ଇଂରେଜ ସରକାରଙ୍କ କାର୍ଯ୍ୟକଳାପକୁ ବିରୋଧ କରିବା ପାଇଁ ଜିଲ୍ଲାର ହଜାର ହଜାର ସ୍ବାଧୀନତା ସଂଗ୍ରାମୀ ଏକତ୍ରିତ ହେବାକୁ ଲାଗିଲେ । ଏହି ସମୟରେ ଅବିଭକ୍ତ କୋରାପୁଟ ଜିଲ୍ଲାର କ୍ରାନ୍ତିକାରୀ ସ୍ବାଧୀନତା ସଂଗ୍ରାମୀଙ୍କ ଆହ୍ବାନ କ୍ରମେ ନବରଙ୍ଗପୁର ସହର ନିକଟ ତାରା ଗାଁ ଠାରୁ ଅଳ୍ପ ଦୂରରେ ଥିବା ଗୁମ୍ମାଗୁଡା ନାମକ ଏକ ଗାଁ ନିକଟରେ 23 ଅଗଷ୍ଟ 1942 ମସିହା ସନ୍ଧ୍ୟାରେ ପ୍ରାୟ 5000 ସଂଗ୍ରାମୀ ଏକତ୍ରିତ ହୋଇଥିଲେ l