ଆଧାର କାର୍ଡ ସଂଯୋଗ ନହେବାରୁ 35 ହିତାଧିକାରୀଙ୍କ ଚାଉଳ ବନ୍ଦ

ଆଧାର କାର୍ଡ ସଂଯୋଗ ନ ହୋଇଥିବାରୁ ମିଳୁନି ଚାଉଳ । ଜିଲ୍ଳାପରିଷଦ ଅଧ୍ୟକ୍ଷାଙ୍କ ନିକଟରେ ଫେରାଦ ହେଲେ ତେନ୍ତୁଳିଖୁଣ୍ଟି ବ୍ଲକ କଣ୍ଟାଗାଁ ପଞ୍ଚାୟତର 35 ହିତାଧିକାରୀ ।

ନବରଙ୍ଗପୁର: ମିଳୁନି ଚାଉଳ । ତିନି ମାସ ହେବ ଚାଉଳ ବନ୍ଦ । ଆଧାର କାର୍ଡ ସଂଯୋଗ ନ ହୋଇଥିବାରୁ ଜାଲ ରାସନ କାର୍ଡ କହି ଫେରାଇ ଦେଉଛନ୍ତି ଡିଲର । ଯାହାର ସମାଧାନ ପାଇଁ ନବରଙ୍ଗପୁର ଜିଲ୍ଳାପରିଷଦ ଅଧ୍ୟକ୍ଷାଙ୍କୁ ଭେଟିଛନ୍ତି ତେନ୍ତୁଳିଖୁଣ୍ଟି ବ୍ଲକ କଣ୍ଟାଗାଁ ପଞ୍ଚାୟତର 35 ହିତାଧିକାରୀ ।

ହିତାଧିକାରୀଙ୍କ କହିବାନୁଯାୟୀ, ଗତ ତିନି ମାସ ପୂର୍ବରୁ ପଞ୍ଚାୟତ ଯୋଗାଣ ସହାୟକ ହିତାଧିକାରୀଙ୍କ ରାସନ କାର୍ଡ ସହ ଆଧାର କାର୍ଡ ସଂଯୋଗ ହୋଇନାହିଁ ତେଣୁ ଏହା ଜାଲ କାର୍ଡ ବୋଲି କହି ଚାଉଳ ନ ଦେଇ ଫେରାଇ ଦେଇଥିଲେ । ଯେଉଁଥିପାଇଁ ସେମାନେ ତେନ୍ତୁଳିଖୁଣ୍ଟି ଗୋଷ୍ଠୀ ଉନ୍ନୟନ ଅଧିକାରୀଙ୍କ ନିକଟରେ ଅନେକ ଥର ଅଭିଯୋଗ କରିଥିଲେ ।

ହେଲେ ସେଠାରେ କୌଣସି ସୁଫଳ ନ ମିଳିବାରୁ ବାଧ୍ୟ ହୋଇ ଜିଲ୍ଲାପରିଷଦ ଅଧ୍ୟକ୍ଷାଙ୍କ ନିକଟରେ ସେମାନେ ଫେରାଦ ହୋଇଛନ୍ତି । ସେପଟେ ହିତାଧିକାରୀଙ୍କ ଅଭିଯୋଗ ନେଇ ଜିଲ୍ଲା ପରିଷଦ ଅଧ୍ୟକ୍ଷା ଜିଲ୍ଲା ଯୋଗାଣ ଅଧିକାରୀଙ୍କ ସହ ଆଲୋଚନା କରିଛନ୍ତି । ଏହାସହ ସେମାନଙ୍କୁ ଯଥାଶୀଘ୍ର ଚାଉଳ ମିଳିବା ନେଇ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଛନ୍ତି ।

ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ