ନବରଙ୍ଗପୁର: ପୁଣି ଭାରରେ ବୁହା ହେଲେ ରୋଗୀ । ଗାଁ କୁ ରାସ୍ତା ନଥିବା ଯୋଗୁଁ ପହଞ୍ଚି ପାରିଲାନି ଆମ୍ବୁଲାନ୍ସ । ଫଳରେ ଦୀର୍ଘ ୬ କିଲୋମିଟର ଭାରରେ ବୁହା ହେଲେ ରୋଗୀ । ଏହିପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ଚକଲାପଦର ପଞ୍ଚାୟତର ସର୍ଗିପାଣି ଗ୍ରାମରେ ।
ଭିଡିଓ ସୌଜନ୍ୟ: ସମ୍ବାଦଦାତା, ନବରଙ୍ଗପୁର
ସୂଚନାନୁଯାୟୀ, ସର୍ଗିପାଣି ଗ୍ରାମର ସାମ ସନ୍ତା ତିନି ଦିନ ହେଲା ଅସୁସ୍ଥ ଥିବାରୁ ତାଙ୍କୁ ଝରିଗାଁ ସ୍ବାସ୍ଥ୍ୟ କେନ୍ଦ୍ର ଆଣିବା ପାଇଁ ଆମ୍ବୁଲାନ୍ସକୁ ଫୋନ କରିଥିଲେ । ହେଲେ ଗାଁ କୁ ରାସ୍ତା ନଥିବାରୁ ଛଅ କିଲୋମିଟର ଦୂର ଫୁଲଝରି ଗାଁ ନିକଟରେ ଆମ୍ବୁଲାନ୍ସ ଅଟକି ଯାଇଥିଲା । ଶେଷରେ ଗ୍ରାମବାସୀ ସାମ ସନ୍ତାଙ୍କୁ ଭାର କରି ପଥରିଆ ପାଦଚଲା ରାସ୍ତାରେ ଚାଲି ଚାଲି ପ୍ରାୟ ଛଅ କିଲୋମିଟର ଦୂରରେ ଥିବା ଆମ୍ବୁଲାନ୍ସ ନିକଟକୁ ପହଞ୍ଚାଇଥିଲେ ।