ନବରଙ୍ଗପୁର:ଅହନିଶି ସେବା କରୁଥିବା ଏ ବୃଦ୍ଧା ହେଉଛନ୍ତି ଜଣେ ମାଆ । 5 ବର୍ଷ କି 10 ବର୍ଷର ପୁଅ ନୁହନ୍ତି 30 ବର୍ଷରୁ ଊର୍ଦ୍ଧ୍ବ ଦୁଇ ଭେଣ୍ଡିଆ ପୁଅଙ୍କ ସେବାରେ ନିଜକୁ ଉତ୍ସର୍ଗ କରି ଦେଇଛନ୍ତି ଏହି ମାଆ ଜଣକ । କାରଣ ଦୁଇ ପୁଅ ଜନ୍ମରୁ ଭିନ୍ନକ୍ଷମ । କୁଲି କାମ କରି ପୁଅଙ୍କ ପେଟକୁ ଦାନା ଯୋଗାଇବା ସହ ସେମାନଙ୍କ ନିତ୍ୟ କାର୍ଯ୍ୟ ମଧ୍ୟ କରୁଛନ୍ତି ।
ବୟସର ଅପରାହ୍ନରେ ବି ପୁଅଙ୍କ ସେବାରେ ଲାଗିଛନ୍ତି, କୁଲି କାମ କରି ପେଟ ପୋଷୁଛନ୍ତି
ଏଇମିତି ପୁଅଙ୍କ ସେବା କରୁ କରୁ 70 ବରଷ ଛୁଇଁଲାଣି । ଏବେ ଆରପାରିକୁ ଚାଲିଗଲେ ପୁଅଙ୍କ କଥା କିଏ ବୁଝିବ, ତାଙ୍କ ଦେଖା ଚାହାଁ କିଏ କରିବ... ସେ ଚିନ୍ତା ଘାରିଛି । ତେଣୁ ଏପାରିରେ ଥାଉ ଥାଉ ସେମାନଙ୍କ ବନ୍ଦୋବସ୍ତର ଗୁହାରି କରିଛନ୍ତି ଏହି ମାଆ ଜଣକ । ତେବେ ଏହି ସ୍ନେହମୟୀ ଜନନୀ ହେଉଛନ୍ତି ନବରଙ୍ଗପୁର ଜିଲ୍ଲା ତେନ୍ତୁଳୀଖୁଣ୍ଟି ସଦର ଉଦୟପୁର ଗ୍ରାମର ସୁନ୍ଦର ମଣି ପାତ୍ର । ଦୁଇ ପୁଅଙ୍କ ଜନ୍ମ ପରେ ପରେ ସ୍ବାମୀ ଆରପାରିକୁ ଚାଲି ଯାଇଛନ୍ତି ।