ନବରଙ୍ଗପୁର: ବେକାର ଯୁବକ ଯୁବତୀଙ୍କୁ ଚାକିରି କରାଇଦେବା ନାଁରେ ଲକ୍ଷାଧିକ ଟଙ୍କା ଠକେଇ ଅଭିଯୋଗରେ ଶନିବାର ଉମରକୋଟ ପୋଲିସ ଭୁବନେଶ୍ବରରୁ ମୁଖ୍ୟ ଅଭିଯୁକ୍ତ ସମେତ ତିନି ଜଣକୁ ଗିରଫ କରି କୋର୍ଟ ଚାଲାଣ କରିଛି ।
ମୁଖ୍ୟ ଅଭିଯୁକ୍ତ ସୁଯୋଗ୍ୟ କୁମାର ଗୁରୁଙ୍କ ଘର ଗଜପତି ଜିଲ୍ଲା ହୋଇଥିବା ବେଳେ ଅନ୍ୟ ଅଭିଯୁକ୍ତ ସୁନିଲ କୁମାର ରାୟଙ୍କ ଘର ପୁରୀ ଓ ସାଗର କୁମାର ଜେନାଙ୍କ ଘର ଜଗତସିଂହପୁର ଜିଲ୍ଲାରେ ବୋଲି ପୋଲିସ ସୂଚନା ଦେଇଛି । ଏମାନଙ୍କୁ ଭୁବନେଶ୍ବରରୁ ଗିରଫ କରି ଶନିବାର ଉମରକୋଟ ଅଣାଯାଇ ପଚରାଉଚରା ପରେ କୋର୍ଟ ଚାଲାଣ କରାଯାଇଛି ।
ପ୍ରକାଶ ଥାଉକି, ଜାତୀୟ ମାନବ ଅଧିକାର ନାଗରିକ କମିଶନ ନାମରେ ଏକ ସଂସ୍ଥା ଖୋଲି ନବରଙ୍ଗପୁର, କୋରାପୁଟ, କଳାହାଣ୍ଡି ଏବଂ ବଲାଙ୍ଗୀର ଜିଲ୍ଲାର ବେକାର ଯୁବକ ଯୁବତୀଙ୍କୁ ବିଭିନ୍ନ ବିଭାଗରେ ଚାକିରି କରାଇଦେବା ନାଁରେ ଜଣକ ପିଛା ଚାଳିଶି ହଜାର ଟଙ୍କା ଠାରୁ ଆରମ୍ଭ କରି ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଠକିଥିବା ଥାନାରେ ଅଭିଯୋଗ ହୋଇଥିଲା ।
ପରେ ଉମରକୋଟ ପୋଲିସ ଘଟଣାର ତଦନ୍ତ କରି ପ୍ରଥମେ ତିନି ଜଣକୁ ଓ ଶନିବାର ଆଉ ତିନି ଜଣକୁ ଗିରଫ କରିଛି । ଏହି ଠକଙ୍କ ଚେର ରାଜ୍ୟ ରାଜଧାନୀ ପର୍ଯ୍ୟନ୍ତ ଲମ୍ବିଥିବା ଜାଣିବାକୁ ପାଇଥିଲା ପୋଲିସ । ବର୍ତ୍ତମାନ ସୁଦ୍ଧା ଏମାନେ ୩ କୋଟିରୁ ଊର୍ଦ୍ଧ୍ବ ଟଙ୍କା ଠକିଥିବା ନବରଙ୍ଗପୁର ଏସପି ସୂଚନା ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
