ଅଟୋକୁ ଧକ୍କା ଦେଲା ବିଧାୟକଙ୍କ କାର, 7 ଆହତ ଜଣେ ଗୁରୁତର

ଡାବୁଗାଁ ବିଧାୟକ ମନୋହର ରନ୍ଧାରୀଙ୍କ କାର ଧକ୍କାରେ ଏକ ଅଟୋ ଓଲଟି ପଡିଛି । ଫଳରେ ସାମାନ୍ୟ ଆହତ ହୋଇଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି ।

ନବରଙ୍ଗପୁର: ଡାବୁଗାଁ ବିଧାୟକଙ୍କ ମନୋହର ରନ୍ଧାରୀଙ୍କ କାର ଧକ୍କାରେ ଓଲଟିଲା ଅଟୋ । ଫଳରେ 7ଜଣ ଆହତ ହୋଇଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି । ପ୍ରଧାନଗୁଡା ନିକଟରେ ଘଟିଛି ଏହି ଦୁର୍ଘଟଣା ।

ଏହି ଦୁର୍ଘଟଣାରେ ତୁମ୍ଭରଲା ଗାଁ ଡମୁ ଜାନି ଗୁରୁତର ଆହତ ହୋଇଛନ୍ତି । ତାଙ୍କ ଛାତିରେ ଗଭୀର ଆଘାତ ଲାଗିଛି । ଦୁର୍ଘଟଣା ପରେ ବିଧାୟକ ତାଙ୍କୁ ପ୍ରଥମେ ପାପଡାହାଣ୍ଡି ଗୋଷ୍ଠି ସ୍ବାସ୍ଥ୍ୟକେନ୍ଦ୍ର ଆଣିଥିଲେ । ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କୋରାପୁଟକୁ ସ୍ଥାନାନ୍ତର କରାଯାଇଛି ।

ସୂଚନା ଅନୁସାରେ,ବିଧାୟକଙ୍କ ନିଜ କାରରେ ମଇଦଲପୁର ଯାଉଥିଲେ । ତେବେ ପ୍ରଧାନୀଗୁଡା ନିକଟରେ ତାଙ୍କ କାର ଏକ ଟ୍ରକକୁ ଓଭର ଟେକ କରି ଅଟୋକୁ ପଛ ପଟୁ ଧକ୍କା ଦେଇଥିଲା । ଫଳରେ ଅଟୋଟି ଓଲଟି ପଡିଥିଲା, ଅଟୋରେ ଥିବା ସମସ୍ତ ଯାତ୍ରୀ ସାମାନ୍ୟ ଆହତ ହୋଇଥିବା ବେଳେ ଡମୁ ଯାନୀ ଗୁରୁତର ଆହତ ହେଇଛନ୍ତି ବୋଲି ଅଟୋ ଡ୍ରାଇଭର ସୂଚନା ଦେଇଛନ୍ତି ।

ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ