ନବରଙ୍ଗପୁରରେ ଭିନ୍ନକ୍ଷମ ମହିଳାଙ୍କୁ ଦୁଷ୍କର୍ମ

ନବରଙ୍ଗପୁରରେ ଲଜ୍ଜ୍ୟା । ଭିନ୍ନକ୍ଷମ ମହିଳାଙ୍କ ସହ ଦୁଷ୍କର୍ମ କଲା ମଦ୍ୟପ ବ୍ୟକ୍ତି । ଅଧିକ ପଢନ୍ତୁ

ନବରଙ୍ଗପୁର: ସୀମା ଟପିଲା ପାଶବିକତା । ମାନସିକ ଭିନ୍ନକ୍ଷମ ମହିଳାଙ୍କୁ ବି ଛାଡିଲେନି ଯୌନ ପିପାଷୁ । ନବରଙ୍ଗପୁର ଜିଲ୍ଲା ରାଇଘର ମୁଖ୍ୟ ବଜାରରେ ଅତ୍ୟନ୍ତ ଲଜ୍ଜାଜନକ ଘଟଣା ଘଟିଛି । ବଜାରରେ ବୁଲୁଥିବା ଜଣେ ମାନସିକ ବିକାରଗ୍ରସ୍ତ ମହିଳାଙ୍କୁ ଜଣେ ମଦ୍ୟପ ବ୍ୟକ୍ତି ଦୁଷ୍କର୍ମ କରିଛି । ଦୁଇ ଦିନ ତଳେ ତାଙ୍କୁ ଦୁଷ୍କର୍ମ କରାଯାଇଥିଲା । ବର୍ତ୍ତମାନ ଏହାର ସିସିଟିଭି ଫୁଟେଜ ଭାଇରାଲ ହେବା ପରେ ଘଟଣା ସାମ୍ନାକୁ ଆସିଛି । ଯାହାକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ତେବେ ଅଭିଯୁକ୍ତ ଜଣକ କିଏ ଏବଂ ପୋଲିସରେ ଏନେଇ ଅଭିଯୋଗ କରାଯାଇଛି ନା ନାହିଁ ସେନେଇ କୌଣସି ସୂଚନା ମିଳିପାରିନାହିଁ ।

ସୂଚନା ଅନୁଯାୟୀ, ଜଣେ ମାନସିକ ବିକାରଗ୍ରସ୍ତ ମହିଳା କିଛି ଦିନ ହେଲା ସହରର ରାଇଘର ମୁଖ୍ୟ ବଜାରରେ ଘୁରି ବୁଲୁଛନ୍ତି । କିଏ କିଛି ଖାଇବାକୁ ଦେଲେ ଖାଇବା ପରେ ‌କୌଣସି ଦୋକାନ ବାରଣ୍ଡା ଦେଖି ଶୋଇ ପଡନ୍ତି । ହଠାତ୍ ମହିଳାଙ୍କୁ ହାବଭାବରେ ପରିବର୍ତ୍ତନ ହୋଇଥିବା ଦେଖାଯାଇଥିଲା । ସନ୍ଦେହ ହେବାରୁ ଗୋଟିଏ ଦୋକାନରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରାଯାଇଥିଲା । ସିସିଟିଭିରେ ଉକ୍ତ ମହିଳାଙ୍କ ସହ ଦୁଷ୍କର୍ମ ହୋଇଥିବା ଦେଖାଯାଇଥିଲା ।

ବିଳମ୍ବିତ ରାତିରେ ଜଣେ ମଦ୍ୟପ ବ୍ୟକ୍ତି ପୀଡିତାଙ୍କୁ ନିଦରୁ ଉଠାଇ ଗୋଟିଏ ଦୋକାନ ବାରଣ୍ଡାକୁ ନେଇ ତାଙ୍କ ସହ ବାରମ୍ବାର ଦୁଷ୍କର୍ମ କରିଥିଲା । ଏହାପରେ କିଛି ନହେବା ଭଳି ସେଠାରୁ ଫେରାର୍ ହୋଇଯାଇଥିଲା । ପୀଡିତା ଜଣକ ମାନସିକ ବିକାରଗ୍ରସ୍ତ ହୋଇଥିବାରୁ ତାଙ୍କ ସହ କ'ଣ ଘଟୁଥିଲା ଜାଣିପାରି ନଥିଲେ । ତେଣୁ ପ୍ରତିବାଦ ମଧ୍ୟ କରିନଥିଲେ । ଏହି ଘଟଣା ସାମ୍ନାକୁ ଆସିବା ପରେ ସାଧାରଣରେ ନିନ୍ଦା କରାଯାଉଛି । ତୁରନ୍ତ ଭିନ୍ନକ୍ଷମ ମହିଳାଙ୍କୁ ସୁରକ୍ଷିତ ସ୍ଥାନରେ ଆଶ୍ରୟ ଦେବାକୁ ମତ ପ୍ରକାଶ ପାଇଛି । ତେବେ ଏହି ଘଟଣା ସମ୍ପର୍କରେ ଥାନାରେ କୌଣସି ଅଭିଯୋଗ ହୋଇଛି ନା ନାହିଁ ସେନେଇ କୌଣସି ସୂଚନା ନାହିଁ । ତେବେ ମହିଳାଙ୍କ ପାଇଁ ରାଇଘର ମୁଖ୍ୟ ବଜାର ସମ୍ପୂର୍ଣ୍ଣ ଅସୁରକ୍ଷିତ ହୋଇଥିବା ଅଭିଯୋଗ ହେଉଛି ।

ଇଟିଭି ଭାରତ, ନବରଙ୍ଗପୁର