ନବରଙ୍ଗପୁର: ଉମରକୋଟ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ସହିଦ ଜଗବନ୍ଧୁ ମାଝୀଙ୍କ ଶ୍ରାଦ୍ଧ ଦିବସରେ ମାଓ ପୋଷ୍ଟର । ଏଭଳି ପୋଷ୍ଟର ଦେଖିବାକୁ ମିଳିଛି ରାଇଘର ଥାନା ହଳଦୀ ପଞ୍ଚାୟତ ଅନ୍ତର୍ଗତ ଅଞ୍ଚଳା-ମିରିଝରୀ ରାସ୍ତାରେ । ଏଠାରେ ମାଓବାଦୀମାନେ ଗଛ ପକାଇ ରାସ୍ତା ଅବରୋଧ କରିବା ସହ ବିଭିନ୍ନ ପ୍ରକାର ପୋଷ୍ଟର ଲଗାଇଥିବା ଦେଖିବାକୁ ମିଳିଛି । ସେଠାରେ କିଛି ତାର ଦେଖାଯାଉଥିବାବେଳେ ସେଥିରେ ବୋମା ଲାଗିଥିବା ସନ୍ଦେହ କରାଯାଉଛି ।
ପୂର୍ବତନ ବିଧାୟକ ଜଗବନ୍ଧୁ ମାଝୀଙ୍କ ଶ୍ରାଦ୍ଧ ଦିବସରେ ମାଓ ପୋଷ୍ଟର ଜାରି
ତେବେ ପୋଷ୍ଟର ରେ କ'ଣ ଉଲ୍ଲେଖ ରହିଛି ତାହା ଜଣାପଡୁ ନଥିବାବେଳେ ପୋଷ୍ଟର ଗୁଡିକ ଇନ୍ଦାଗାଓଁ ଏରିଆ କମିଟି ପକ୍ଷରୁ ଲଗାଯାଇଥିବା ଉଲ୍ଲେଖ ରହିଛି । ସେପଟେ ଗୁରୁବାର ରାଇଘର ଥାନା ଗୋନା ହାଟପଦା ଠାରେ ପୂର୍ବତନ ବିଧାୟକ ଜଗବନ୍ଧୁ ମାଝୀଙ୍କ ଶ୍ରାଦ୍ଧ ବାର୍ଷିକ କାର୍ଯ୍ୟକ୍ରମ ଚାଲିଥିବାବେଳେ ସେଠାରୁ ମାତ୍ର ୭-୮ କି.ମି. ଦୂର ତଥା ଛତିଶଗଡ଼ ସୀମାନ୍ତବର୍ତ୍ତୀ ଅଞ୍ଚଳା-ମିରିଝରୀ ରାସ୍ତାରେ ଏଭଳି ମାଓବାଦୀ ପୋଷ୍ଟର ଲାଗିବା ଘଟଣା ଅଞ୍ଚଳବାସୀଙ୍କୁ ଆତଙ୍କିତ କରିଛି ।